Ana Tangira Te Uea

 Ngkanne I a katauraoai ao I a mwananga n 2.30pm bon te itera n aoa imwaain ana tai te Uea are e tuangai.  Bon imwaain mwanangau ao I a kaman karaoa tain au tareboon (alarm) bwa e na tang n te 3.00 pm raoi are au tai ni manga ana au tataro ke au Divine Mercy.  Ngke I a tekateka ngkanne n te umwantabu ni kakantaninga te aoa 3pm ao ti tebo I a bon tuangaki naba bwa n na tiringa ana alarm au tareboon bwa e na bon roko ngkana e boo 3pm.  Ngke I tara tain au tareboon ao tao te aekaki ae ai ti 12 ke 13 miniti ao e a boo teniua.  Ai ngaia are I tiringa au alarm ao I a bon kainabwaabu.  Ngkanne inanon au tai ni kainabaabu ao ngai irou e a bon rang maan mwiin au tai n tataninga ao I a katautaua bwa e a rang kaman boo teniua.  Ao e a roko te iango are I taku bwa tao e aki roko Iesu n ana tai are e tuangai.  Ma ngkanne inanon au tai ni kainabaabu ao ti tebo kanga I a katei tamneia are aongkoa e a kaan roko Iesu aongkoa are e nang rin n te mataroa.   Inanon au katei tamnei ao e a bon roko naba te ang teuana ae e rang uti iai kuniu ao I ataia bwa e a roko Iesu ao I a kainakoa naba baiu n noora te tai iaon au tareboon ao ngaia ai bon ti teuana te miniti ao e a boo teniua (2:59pm).  I a teirake ao I katorobubua I Matan te Eukari ni katauraoi nakon au Divine Mercy.  Ngke e bane au Divine Mercy ao I a tekateka ni kainabaabu ao n taetae nakon te Uea bwa tera ana rongorongo are e na tuangai.  Ao e a taetae bwanaan nanou ao e a tuangai bwa n na reitaki ma kaain au botaki n tataro ao kaain rarikiu bwa a na atoatonga naba te tataro aio (Divine Mercy) n te aoa 3pm ao are e kakaonimaki nakon te tataro aio ao e na bon kaekaki n te tai ae e waekoa ana bubuti ngkana e tang nakon te Uea ibukin buokana.   Ti tebo I a bon rang nanokokoraki n te bwana arei ao I taku ngai bwa bon ngai ae I taetae bon irou.  Ma I mimi ngke I a manga kaekaaki naba ao e taku “Ngai ae Iawe ae I taetae I nanom.  Ao I a tuangnga ngkanne te Uea bwa n na kanga ni kakoaua ae bon ngaia ae e taetae inanou.  Ngkanne kaekana, e kangai “ Ko na kakoauaai ngkana ko tia n reitaki ma kaain abam imwiin okina n exam bwa e na kukurei imwiin ana ukeuke”.  Ngke I a okirikaaki ao ai tibwa mwiin aua teutana n te bwakantaai.  Kanga e bon tuai kan boo nimaua bwa tao ai bon tibwa mwiin iteran aua ao e kaoti kaain abau bwa e a oki man ana exam are e na riai ni bwara n te aoa nimaua.  I aki tabwara ma I a bon tuangnga naba bwa e uara mwiin ana exam ao ngaia e taku bwa kanga e aki rang kukurei bwa e korakora riki raraomana n ana bwai n reirei are teuana.  Ao ngai kanga e a moanna n roko irou te nanokawaki ao I a bon tuangnga raoi bwa e na kaotia bwa e uara mwiin ana exam, ao ngaia are e a bon kaotia bwa e bon kukurei iai.  Ao ikanne are I a bon ataia bwa ngaia bon te Uea are e taetae inanou n te tai arei.  Bon kamimin naba te bwana are inanou bwa ngkana I a bon tibwa taetae ao i a bon kaekaaki naba n te tai ae e waekoa are ngai irou ngke arona bwa ngai ae n na manga bon kaekaai ao e na rang maan kaekaana irou bwa n na iangoa raoi bwa tera te bwai ae n na taekinna.   Teuana riki te bwai ae e kamimi bwa ibuakon bwaai ake I kataunareei bwa e na tuangai te Uea bon akea teuana ae e roko maibuakona ao ai bon taekan te Divine Mercy are bon akea ibuakon bwaai ake iangoi.

AO E RABWA TE UEA

Taouea Reiher, St. Padre Pio, Suva, 2010