Nna manga tiba naba ngkai ana tangira te Uea nakoimi are E anganai inanon ara tai n nebonebo ni katituaraoi ba kanoan ara waaki n St Padre Pio ni karinea aia toa tarira ma manera ake a bon tia anganaki te tokanikai inanon te kimarerei i Karawa n te tabati are Aia Toa Kain Karawa. I rangin tauraoi ni koaua ba Nna neboa te Uea n te bong anne ao ibukin nanou ni katauraoai raoi ao Ia kaman namakina te kaokoro n au taratara ao I bubutia Iesu ba E na na nanoangai ao ni kaota moa natiu nakoiu ba I rangi ni kan noria n aia Toa kain karawa n te ririki aio ba are e a bon koro teuana ana ririki ni kitanira ao I a kan noria n arona ni kukurei ma kain karawa n akea marakina irabatana n aron are i tataneiai iai n noria inanon ana tai ni maeu irarikira. Inanon te tutia n te ingabong anne ao e bon taonai te tang ae bati ngke I a kaitibo ma Rabatan Iesu ba I ataia ba anne te amarake are bon kanaia kain karawa ni katekeraoa aia bong anne. I kakaea Barry nakon Iesu ma e bon aki te roko ni kaotia nakoiu n te ingabong anne. E bara te tutia ao I aki bara n nano ni bubutia Iesu ba E na bon kaota natiu inanon te ngaina anne.
Boton te karaki
Imain warekan ae imuina ao I a bubutiko ngkoe ae ko tabe ni wareware ba ko na karekea iroum te iango ae ko na bubutia Iesu ba Ena nanoangaiko ao E na anganiko te nano ae maraurau ni butimaea ana kamaiu nakoim inanon warekan te karaki ae ae ko nang tauraoi n ongora.... E Raba te Uea!!!!!
Inanon te bakantaai anne ao akea ba ti a bane n tauraoi ni kabane ma kain ara botaki ba ti na nebonebo ma are bon iai angin te bong anne ba are ai bon te reitaki ni koaua ma kain karawa n neboa aran Iesu are E a tia ni katabwena aia Toa kain Karawa, ngkai boni Ngaia are E a tia ni mate ao ni maraki iaon ana kaibangaki ao E a tia n tokanikai ao n tekateka i angatain Tamana i Karawa.Te kamimi inanon te tai aio ba e tuai waki te nebonebo ma ngai I a kaman tang ao n uruaki kakaiaki n te aro ae I a bon namakina ana nanoanga te Uea nakoiu ibukin anganakiu te maiu ae boou ao ai tera arou ba Nna kateimatoai iai ni koaua ba I aonga ni kona n roko Irouna neboia ma kain Karawa n aron ae ti karaoia iaon te aba. I main raoi te nebonebo ao I a tabeka te kuna are “E weteai Iesu ba Nna Iria” ma imain anne ao Uriam e tuatua naba nakoia ara koraki ba e na bon weteaki Iesu raoi ni kaomataki ni koaua ao E na kaoaki man te Umantabu are 2 te miniti raroana ma ana auti Uriam. Ai ngaia are e a bubutia ara koraki Uriam ba a na kamawa kawain Iesu ngkana E roko imatan te mataroa Iesu ba E na mananga man te Ukari man te umantabu ao ni kawarira n te auti. I a tabeka te kuuna arei ma ai bon te kamimi nakon au namakin n au taratara ba I a noora te bai ae e a rangin riaon au kantaninga ba I a nora moa te ota ae e otanakoa mai matau ao imuina I a rinnako inanon te Uamantabu are e weteaki Iesu mai iai. I bon nora Iesu ni koaua are e a butimaeaki ni kaotinakoaki man te Ukari iroun ingoan ara botaki are St Padre Pio ao man tauaki baina ni karokoaki i tinanikun te Umantabu ao ni butimwaeaki iroun St Mikaere te Akaanera n tauraoi ni kairaki nakon te tabo are ti botaki iai. Ngke E otinako Iesu man te Umantabu ao I a noria aomata aika ake a rangin bati maitia ni bwereina kawain Iesu ma kunikaia te kamarai ae mainaina. I kona n ongo tangin te aoti (horse) ao tangin naba aia bare (belt) tautia ake a kaina ana baronga n tautia St Mikaere. Bon iai naba te boi ae kaokoro boina irou n te tai anne are kanga ai aron boin te roti e rangin boiarara. A bon rangi ni bati riki namakin I a mena inanona n te tai anne ma I kubanako ba inanon ana tai Iesu ni katauraoaki imain manangana ao e a kanakoa naba baina Iesu nakoia te koraki aika a rangin bati ake a b’ai mainaina ao e a katika bain te teinimane are I a kaman tataro ni bubuti ba e na kaotia nakoiu n te bong anne are e a taua bain Barry ao man kateia i moana ba ngaia ae e na kairia nakon te tabo are ti nebonebo iai. Ngke E a roko Iesu i matan te auti are ti nebonbeo iai ma raona are Barry ao kanga I bon aki waekoa ni kiina natiu B are I a tia n rangin tataneiai n nonoria ni kainnano ngkoa ma moana aika rawawatau ma ai bon te kamimi n te tai aio ao e a rangi n toka ribana ao ni botonim’ane ma ana kamarai ae mainaina n taua bain te Tia kamaiu nakon ara tabo nebonebo.
I nora natiu ni bon karokoa Iesu i buakora n te tai anne ao I a bon rangi ni karabaraba n ana tangira te Uea nakoiu ngkai E a tia ni kaeka au bubuti ao man katauai ba Nna manga kona n noora matan natiu n te bong anne n aron are I a tia ni butia iai. E maunanko au taratara ao i a riki ba temanna te aomata ae i tatakarua neboa te Uea n te bong anne ma nanou ni koaua ma nanou ae eitiaki nakoina. Amen. E rangin raraba te Uea n ana tangira nakoira!!!!!!
Ian Namakin. St Patre Pio, Suva