Inanon Turai n te ririki ae nako, ao e a manga baka naba n aoraki Barry n te aro ae kanga e bon titiraki iai nanou nakon te Uea ba e na kamarurunga natiu aio, ma te kamimi teuana ba maitin au tataro nakoina ao baitin rawawatan riki natiu n te maraki are e weweneakinna. Aio naba te moan tai are I kata iai te katoki aoraki ae te katoka bai are I ongongo naba ae kakaraoaki n te botaki n tataro ni charismatic aio ngaia are I a kataia ni karaoia ma inanon waakira ni katoka bai ao e a rangi ni bati te kamimi ae e a kaoti raoi man te tai anne. Inanon ara tai n tataro iaona ao titebo ma e wiriwiriki te Uea ni tuangai ana rongorongo aika a bati ibukin anganakiu natiu ae te aekaki aio. Teuana mai iai boni kamatatakiu ba Nna uringa ana reke ni bong natiu aio are e bakara raoi te “New Millennium’ are 1 Tianuare, 2000, are e rebwe taua iai te aonaba ae banin n te kukurei”. Ngke I ongo anne ao e bon rangi ni korakora irou te tang ao te uringaba. E aki toki ana wiririki te Uea ma e a manga tuangai riki are “te tei ane imatam anne, aron karaoan rabatana Irou e rangi ni kanganga riki nakon karaoakin rabatam Irouna ao e rangi ni bobuaka riki karaona nakon te bai ae ko rangi ni mataiakinna inanon maium”. E a kakorakora riki te tang irou ba I a tiba kunea ae bon te tia bure ngai n arou nakon te Uea n riribaia, e ngae ngke Ngaia E a bon tia ni karaka arou mai buakoia karo aika a bati, n anganakiu natiu ae rangi ni kaokoro. Man te tai anne ao e a riibu naba au onimaki irouna ao I a kaburea naba maeun natiu Nakoina. Inanon te tai ae e aki rangi ni maan ao ti a rin n te onaoraki ba e a bon roko ni korakorana aorakin natiu are ti aki kona n taua riki iai n te auti kioina ngkai e a rangi ni mamara. I uringa naba te tai anne ba e rangi ni korakora te tataro mai irouia kain ara botaki n tataro ao titebo ma e bon anganira naba te Uea te kakorakoraki n te maraki are ti a uouotia inanon te tai anne. Ni mamaran natiu anne ao iai au bubuti iai nakon te Tamnei ae Raoiroi ba E na reireinai te nebonebo ni ianena ao I karaba ba E bon anganai naba n te tai are I tuanga iai, ba e a bon tebenako naba irou n te karangaina teuana inanon wenen natiu ma te maraki n atu ae korakora ao ngke e a nako au taetae ni ianena ao e a marau nako naba te maraki arei iroun Barry ao e a rau naba ni matu. I taku ba e rangi ni bati ana kamimi te Uea nakon natiu aio ma I a bon tiba kunea raoi naba ae bon ana kamimi raoi te Uea nakoiu.
Inanon Tebetemba n te ririki naba anne ao e a bon roroko n tokina marurungin natiu aio ao e weteai te taokita ni karaua nanou ba Nna tuanga natiu ba ngkana e matu ao ngkana e uti ni matu ao e nang nora Iesu i karawa... Tera am iango ngkoe ngkana e tuangko te taokita te aeka n rongorongo aio? Ngai e wawanako ranin matau ao e rotai te tang ao I bubutia te Uea naba n te miniti arei ba E na kakorakorai. E bane ana maroro te taokita ni karau nano nakoiu ao ngai I manga kaeka nakoina ni kangai, “I taku ba e nang bon riai n anaaki natiu iroun Iesu ba e a tia tabena are e roko ibukina ba I a KIINA IESU”. E aki manga taetae riki te taokita ma e a wawanako ranin matana ngke I tabeka au taeka akanne nakoina.
E motirawa natiu ni karangainan te Moanibong, 29 Tebetemba, 2009, are e kinaki te tai anne n ara karentare ni Katorika ba aia toa Aka-Anera ake teniman ake St Mikaere, St Rabaere, ao St Kabiriera. E bon kaotia iai nakoiu te Uea ba e rangi ni kakawaki tetei anne
Irouna ba boni ngaia ana tia ua rongorongo nakon te aonaba aio are E tia n onikia nakon te iriko ma te rara, ba e na kaiokai ma Ngaia inanon au tangira nakon natiu aio.
I teimatoa n onimakina te Uea ni karokoa te bong aio ba Ngaia bon iai bukin baai ni kabane ake E anganira n tatabemanira nako ao riki iroun natiu are E anganai ae e kabi n taetae ao ni bonotaninga ao e bon roko naba ana rongorongo irou ae kangai “E Rangi ni Uarereke te Maiu Aio ao E Raoiroi te Kakatauraoi”. E raba te Uea n ana tangira.
Ian Namakin, St Padre Pio, Suva