Kanan Tamneira...

E karaoi baai ni kabane Iesu ba ti aonga ni katotonga ao ni karaoi naba kakai ake a tia ni karaoi ao aika a kakannato riki. Ma ti na kanga ni karaoi baike a tia naba ngaia ni karaoia? Eng e na kona n reke aio ngkana ti onimaki ni koaua ba E maeak ni koaua Iesu i nanora ao ngaira ti maeka inanon Iesu ao e na bon makuri inanora ngkana ti onimakinna ao ni muiokoi bai nako Irouna.
Ngkana ti tataro ni katoki aoraki ao ti riai n uringa are bon tiaki ngaira ae ti karaoa te makuri ma bon Iesu inanora ae na karaoi bai nako. Ti riai ni butia Iesu ba e na anganira makana ao korakorana ni karaoa are E a tia naba ni karaoia ngke E maiu i aonteaba.
Ngkana ti onimakina makan te Atua ao ti na bon kona ni karaoi bai nako n Aran Iesu. Ti n aki onimakina oin korakorara ba ti na reke iai n te kanganga ngkana ti moanna n nano uoua, ke ngkana a tionako ara taratara ma iaon Iesu ae boni Ngaia te Taeka ae kariki bai nako ba e mananga mairoun te Tama are bon moani baai ao tokiia.