Kanan Tamneira...

Te motiki taeka bon taekan te bai ae na riki nakoira ngkana ti a roko n tokin kawaira n te maiu aio. Ba a na taraaki arora ao ni baireaki ba ti tau n rin te Abanuea ke ti aki. I aon te aba ao arora n aomata are te kan motiki taekaia aomata ba aongan oti raoiroira riki iaoia raora ao ti na kamoamoa iai ba akea ara kairua.
N angin te tai ao ti karaoi bai ibukina ba ti makuia aomata ao ti rawa ni motikaki taekara irouia nakon ae aki tamaroa. Eng angin te tai ao ti maaka aia motitaeka aomata ai ngaia are ti karaoa ae ti na aki motikaki taekara iai.
Tariu ao maneu, tera te bai ae kakawaki iroum n te maiu aio? Te mena n ana itera te Atua ao ni motikaki taekam irouia aomata ke te tiku n aia itera aomata ao ni motikaki taekam iroun te Atua?Ti kakoaua ba angin te tai ao te bai ae kakawaki iroura bon aron tarara irouia aomata ao n angina te tai ao e moani bai iroura aia taratara aomata ma te bai ae kakawaki ba aron tarara iroun te Atua.
N aron ana reta Bauro nakoia i Korinto n te bong aio n te moani wareboki ao E taekinna Bauro ba e bon aki tabe n aia motikitaeka aomata ma te bai ae makua bon motikan taekana iroun te Atua are na baireaki ba tera ae na riki nakoina n tokin ana borau n te maiu aio- te maiu n te kukurei ma te Atua ke te mate ae akea tokina i moone ike ti na bon aki kona n noora iai matan te Atua. Tariu ao maneu bon te oi n rongorongo nakoira n te bong aio bon te tei n ana itera te Atua ao a na motikaki taekara iroun te aomata nakon ae te mena n aia itera aomata ao a na motikaki taekara iroun te Atua. Eng e na bon akea ara kanganga ngkana ti nim n taai nako ma te Atua. Ti na bon aki rotaki n te kainnano, te baki ao te rawawata. Ti na bon aki kona n reke n te kanganga ke n rotaki n te kabuanibai iai. "Bon te Atua te tia kawakinai bon akea kainnanou, E kairai nako etan karaanga ni kamaitoroa iai tamneiu" ba Nna kukurei ao ni kabaia ma Ngaia iai n aki totoki.