Kanan Tamneira...

N te ewangkerio n te bong ao ti ongora taekan Iesu ni kitaniia ana reirei nakon te maunga ba e na tataro ni kabanea te tairiki. Ma a bon aki bane n tamarakea te maunga te koraki aika tataro. Bon ti te koraki ake a bon tataro raoi ma nanoia ni kaoaua ae a na kataia moa n tamarakea te maunga ao kitanii bain te aonnaba ba a aonga ni kona n taratara ma ieta ma te tangira ao te kainaoamataaki man katabeiangan te aonnaba ao te maiu aio. Ma te koraki ake a bon tautoronaki ni kaubain te aonnaba a na bon aki tamarakea te maunga. Ti kauringaki ikai ba ngkana ti ukera te Atua ao ti na bon tamarake ni bubutia te Atua ana buoka ao ana kamaiu. Bon mai taubukin te maunga ae ti kona iai ni tatakaruaea te rongorongo ae raoiroi nakoia aomata are bon rongorongon te kimarerei nakoia aika a rawawata ao te inaomata nakoia aika kabureaki. Bon akea te bai ti kona ni karaoia ngkana arona ba ti kataia n takaruaea te rongorongo ae raoiroi man te tabo ae rinano are bon katikitiki naba iai baikorakin te maiu aio. Ngaia are ti bon bane ni kainnanoa te tai inanon maiura aio ba ti na tamakaea te maunga ao n tataro i taubukin te maunga ba ti aonga ni kamaiuaki ao ni kona naba n tatakaruaea te rongorongo ae raoiroi.