Kanan Tamneira...

Teuana te koaua ae moan te kakawaki ibukira ngaira taan kekeiaki n rimuin Iesu bon taekan te kaibangaki ae boni ngaia mataroan te kamaiuaki ibukira ni kabane. Bon te kaibangaki are tauraki iai Iesu mani uoti rawawatan ara bure ae ti na bane n taraia ba ti aonga ni kamaiuaki man ara bure. Ti ongora n te moan wareboki taekaia Iteraera ngke a ngurengure inanon manangaia n te rereua ao a uringa aroia ni kakang burawa ao iriko i Aikubita. E un irouia te Atua ao e kanakoia taian naeta ba a na tenaaki iai. A butia Mote te nati n Iteraera kamaiuakiia man te naeta ao e nanoangaia te Atua ao e tuanga Mote ba e na karaoa tamnein te naeta man te buraati ao a na tabekia iaon te kai man taraia ake a tenaaki ba a aonga ni kamaiuaki. N te tai aio ao ngaira ake ti tenaaki iroun te riaboro rinanon te bure ao ti tuangaki ikai ba ti na tabeki matara n tara Iesu iaon te kaibangaki are toka iaona rawawatan ara bure ao ti na kamaiuaki. Eng bon marakin Iesu ao arona ni kananoanga are e kamaiura man ara bure ba ti aonga ni manga riki ba kariki bai aika bou aika ti a tia ni kaitiakaki man ara bure ba uan marakina ao maten Iesu.
Tariu ao maneu ti a bane n reitiira n te toa aio n atonga ara tataro ae kangai,"Ti neboiko te Kristo ao ti taromauriko ngkai Ko kamaiuira n am kaibangaki ae moan te Tabu".