Kanan Tamneira...

Ti uringa aron taekan te karikibai ba E taetae te Atua ao a bane ni karaoaki bai ni kabane. Bon akea te makuri ae karaoia te Atua ma bon ti maakan ana taeka ae karaoaki nanona.
Aron kingin te kamaiuaki are reke nakon ana toro te mataniwi ni bubua aio bon ana kakoaua ba bon te Atua ae tautaeka iaoia Uea ma maaka ao korakora nako iaon te aba, Boni Ngaia te Atua ae aki kainnanoia ba E na karaoa te makuri ba ti man makan ana taeka ao a karaoaki naba iai baai nako. Bon aio taekan Iesu are boni Ngaia te Taeka are iai mangkoa ao bon te Atua Ngaia. Bon Iesu are a tia anganaki te maaka ma te tautaeka i Karawa ao i aonteaba. Boni Ngaia are karika Karawa ma aonnaba man te moan tai.
Tariu ao maneu ti bon aki kainnanoia ba e na mena Iesu irarikira n Rabatana ba akea irouna te tutuki ibukin te raroa ke te tabo ba are bon te Atua Ngaia. Ti na butia te Atua ba e na anganiira te onimaki ni koaua ba bon akea te bai ae aki kona ni karaoaki iroun Iesu ao e na bon kaekai ara bubuti ngkana e noria ba a bongana ibukira. Ba are ngaira aomata a bon toki ara taratara i tabon bairira ao ti aki kona n nora are i aona. E bon kakawaki naba iroura ba ti na butia te Atua ba e na anganira naba te maaka ni kona karaoa ana makuri ni kamaiu nakoia ake a kainnanoa ana kamaiu ma ana tangira. Are nanona ba ti na rabatana Iesu ao n taetae Ibukina n onimakina ana kamaiu ae ti na anganiia tarira ma manera.