Kanan Tamneira...

Aikai bon ana taeka Iesu nakon natin te tina temanna ae te mane are a wene inanon baokina ba e nang tauraoi n taunaki. Ngke e nora te mate aio Iesu ao e taonna te nanokawaki ao te nanoanga ibukin te mane are mate ao ibukin naba tinana are bon ti temanna natina ao are nang tiku ngkai n nikiranroro. N te katei n Iutaia ao e bon rangi ni kamama taekan te aine ae kanoaboo. Ai ngaia are Iesu e bon nanoanga naba te aine aio ibukina ba e nang katinanikuaki ngkai e nang akea natina ibukina ba e kanoaboo.
Ti nora te reirei ae Kakawaki ikai ba bon tauraoin Iesu ni kabebeteira inanon rawawatara ao riki ni kaoka te maiu nakoira e ngae ngke e tara ni kanganga ba ai bon te mate ngaira. N te tai aio ao e tauraoi te Atua n kamaiura man ara bure ngkana ti tan nakoina. Aio bon tibangara ae kakawaki ae te Ekaretia. Ti riai naba n kakoaua ba ngkai bon rabatan te Ekaretia ae ti teuana ngaira ao ti na bon tauraoi ni karekea te buoka ao te kamaiuaki man aia buoka tarira ao manera ake bon kain te rabata ae ti teuana ae te Ekaretia. N aia tataro ao aia buoka raora ao ti na karekea te kamaiuaki ao te kabebeteaki.