Aikai bon ana taeka Iesu nakoira n te bong aio are kan kamatoa nakoira ba e aonga n akea te nanoua iroura ba tera ana kantaninga te Atua man te moan tai ibukira. Eng tariu ao maneu iai ngkoa te rongorongo are I tibaia ma ngkami tao n 2011 are bon taekan te "Law of Gravity" ao te "'Law of Divine Grace". Eng e tataekinaki irouia tan rabakau ba iai n tai nako ana katikitiki aonteaba n te aro are ngkana arona ba iai te bai ae ti kaaki mai baira ao e na bon baka nako naano ba iai te katikitiki. N te tua aio ao bon kawain bai nako ba a na baka nako aontano ao bain aonteaba a na bane ni baka. Ma ngaira aomata ake ti a tia ni karikaki ba katotongan te Atua ao bon kawaira man te moan tai ngke ti karikaki ba ti na bane ni mwemwe rake nako karawa nakon Tamara ae te Atua. Ti a tia ni bane ni karikaki ba ti na tabekakirake nako Karawa ao ti na aki baka.
Eng n te tai aio ao E kamatoa nakoira Iesu ba ike E mena iai ao ti na mena naba iai ngaira. Bon Iesu ae ana Rikitemanna te Atua are kanakoaki nakoira ba E na kaota miterion ana tangira ma ana kamaiu te Atua ibukira. Bon Iesu Ngaia te Atua ae riki n aomata ba E na kakoroa nanon ana Berita n Akoi te Atua mai moana. N te ewangkerio n te bong aio ao ti ongora aron ana kabanea ni maroro Iesu nakoia ana reirei imain waerakena nako Karawa. E kangai Iesu; "tai katabeaingai nanomi ma onimakina te Atua ao onimakinai" Ba a maiti tabo ibukimi n ana Auti Tamau ao ngke arona e aki koaua anne ao Nna bon aki tuang ngkami ba N na nako ni katauraoa nnemi i Karawa". Eng ti bon riai n onimakina ana taeka Iesu ba a maiti tabo ibukira i Karawa.
Tera ngkanne nanon ana Taeka Iesu ae na manga nako ni katauraoi ara tabo i Karawa? Eng bon tiaki nanon aio ba e na nako Iesu n tiba katei ara auti ma bon nanon aio ba Iesu are bon Ngaia te Atua ao te aomata e a tia ni kauka karawa nakoira ni kabane ngke E riki ngaia ae te Kristo moanuaan te anga karea nakon teTama ngke e mate ao E mangauti. nakon te maiu ae akea tokina. Bon Iesu inanon waerakena nako Karawa are E kauka ao n reita Karawa ma aonnaba ao e kaota nakoira kororaoin te kukurei ao te mimitong are ti na roko naba iai ngkana ti iriira Iesu. E kauringira naba Iesu n te bong aio ba ti na bane n roko i Karawa ngkana ti karika raoi Iesu ba te Kawai , te Koaua ao te Maiu". Eng bon aio Tuan Ana Karatia te Atua ibukira ngaira ana karikibai ba ti na bane ni mwemwerake nako Karawa nakon te maiu ae akea tokina ao ti na aki kataua ba ti na tineaki n ana katikitiki aonteba nakon te mate ae akea tokina.