Kanan Tamneira...

Akea ba ti a roko n tokin ana namakian Nei Maria ao tao e bon riai ba ti na titirakinira ba tera ara waaki inanon te namakaina aio aika ti a tia ni karaoi aika karakaa aron kaotan ara tangira nakon tinara Nei Maria? Eng e bon riai ba ti na tuoi raoi muin ara kekeiaki n te itera aio ao ni kataia ni katamaroa nakon bong aika i maira. Ti bon riai ni kamatoai ara koaua iaon Nei Maria ae boni Ngaia ana baintangira ae moan te kakawaki te Atua nakoira ibukin maiura ni kekeiaki ni irira kawain Natina ae Iesu ae na kairira nakon te kabaia ae akea tokina i Karawa.
Tariu ao maneu ti na katurui ara iango iaon te bai ae riki iroun Nei Maria man te Kaoti-Taeka. Ngke roko Kabiriera nakon Nei Maria n uota ana kamauri te Atua. ao e bon mimi mani maaku Nei Maria ao e taku Anera; "Tai maku Maria ba e korakora tangiram iroun te Atua ba e rineiko ba ko na riki ba tinan Natina." E kaeka Nei Maria n titiraki ba e na kanga n reke aio ngkai e aki ata te mwaane? E kaeka te Anera man taku ba "E na ruoniko te Tamnei ao Raoiroi ao man rabuniko maakan te Atua ae Moan te Rietata ao e na riki n iriko inanom te nati te mwaane ae Natin te Atua." E a manga kaeka Nei Maria ni kangai; "Ana toro te Uea Ngai; E na karaoaki nakoiu n ai aron am Taeka."
N reitaki ma ara kakatauraoi imain Bentekota ao teuana tibangara n te bong aio bon kaotan uaan te Tamnei Raoiroi ao mmamakurina inanora. Nei Maria are kaonrakeaki iroun te Tamnei ae Raoiroi inanon te Kaoti-Taeka, e ingainga nanona ni kan kawara ai tinana are Nei Eritabeta. E taekinaki ba e kaewaekoa Nei Maria ni mananga ni kawaina ae maungaunga nakon Nei Eritabeta are kanga e a moanna n rawawata ba ai ana ka-onoua n namakaina ni bikoukou.
Ti riai naba ngaira ni katauraoira nakon ana kairiri te Tamnei ae Raoiroi inanon Bentekota ba ti na katotonga Nei Maria n ingainga ni kan kaota ara tangira ao ara ibuobuoki nakoia tarira ma manera ni uota rongorongon te rairannano ao te kabarabure. E bia riki te Bentekota ae bou 2019 ba ara tai tai n reitia Abotoro n riki ba tan kakoaua ana kamaiu te Atua are ti anganaki iroun Iesu n te Bakate. Ti bia katotongiia abotoro ni kaonaki n te korakora ma te ninikoria ni kabuta te Rongorongo ae Raoiroi.