Kanan Tamneira...

Tariu ao maneu inanon ara tai ni kakatauraoi imain Bentekota ao ti boni bae n titiraki iroura ba tera te aro ni katauraoi ae ti riai ni karaoia? Eng tariu ao maneu te katauraoi ae ti kainnanoia bon te rairannano. Ti kainnanoa te kaitiaki n ai aron ana babetito Ioane are taekinaki nakoira n te moan wareboki n te bong aio. N ana titiraki Bauro nakoia te koraki ba a tia ni butimaea te Tamnei ae Raoiroi ao a taku te koraki ba aki ataa te Tamnei ae Raoiroi. E tuangiia ngkanne Bauro ba imuin te rairannano ao te kaitiaki ao ngkanne ti kainanoia te babetitoaki n Aran Iesu ba ti aonga n ruonaki ao ni kaonrakeaki n te Tamnei ae Raoiroi.
Ngkana ti ruonaki ao ni kaonrakeaki iroun te Tamnei ae Raoiroi ao te bai ae riki ba ti a riki ni koaua ba natin te Atua ao ai ti teuana ngaira ma Iesu ao te Teniman n Temanna. Bon te katiteuanaaki aio ngaia ae karekea nakoira te kabouaki ao te kona ni kairaki iroun te Tamnei ae Raoiroi. Ngkana e inaomata iroura Tamnei te Atua ao nanona ngkanne ba ti ririmuin manekan te Tamnei ae Raoiroi ao ti aki rimoana ke ti bon toua te kawai teuana. Bon te aro ni maiu aio ae na kabarabara raoi nakoira nanon te taeka ae te Maiu ae Onraken te Maiu are ti na bon namakina iai n taai nako te raoi ao te rau i bukina ba ti muiokoa te Atua ba E kawakinira ao e kakaiririira. E na reke te raoi iroura ibukina ba ti ataia ba ti maeka inanon Iesu ao Iesu e maeka inanora. Ao ngkana E maeka Iesu inanora ao bon akea te bai ae ti na na tabeaianga iai ba bon te Atua ba e maeka inanora Teuare are a tia n tokanikai iaon bai ni kabane are E tautaeka iaon bai ni kabane n tai nako.
Tariu ao maneu a na bon rau nanora n tai nako ngkana ti nim ao ti riki n ti teuana ma te Atua are ti kakoaua ba Ngaia moan bai ao tokia, Ngaia te Areba ao te Omega, Ngaia are iai ngkoa, iai ngkai ao iai n taai nako. Ngaia are aki kona ni bibitaki n arona n kororaoi ao n onrake n te raoiroi, te tangira, te nanoanga ao te kakaonimaki. A taku ba ngkana ko uaua i marawa ao ko na kunea ba e rangi ni buaka eta ma ngkana ko tebo nako nano ao ko na kunea ba e rangi n raoi. Ai uana naba ma aron maiura aio ba a na bati kanganga aika ti na kaitibo ma ngaai ma ngkana ti kan karekea te rau ao ti na riai n ruo rikaki nako nanora ao ikanne are ti na kaitibo iai ma te Uea ao ti na kunea iai te raoi ao te rau ni koaua.