Kanan Tamneira...

Tariu ao maneu ti uringa ara Tama ae Fr Koru n ana rekenibong n te bong aio inanon nakoana ni berebitero. Bon ara inga, ara katekeraoi ao ara karabaraba ae moan te bati nakoim Tamara ibukin am beku ae moan te bati ibukira ao ibukin ara botaki ni charismatic iaon Kiribati. Ko a tia n riki ba te korakora ae kakawaki nakoira inanon ara kekeiaki n iriira Iesu ao n riki ba bannan ao rabatan Iesu nakoia aomata, riki te koraki ake a bua man raroanako ma ana tangira Atiniban Iesu ae moan te tabu.
Ti reitira naba ni karaba te Uea ibukin ana baintangira ae boni ngkoe ara berebitero ao ara tia kawakin tibu. N ai aron are e taekinna Bauro nakoia I Korinto n te bong aio ao ti reiti nanora n tataro ibukim ba ko na riki ba te karea ae itiaki n tai nako nakon te Atua are e na aki rotaki n ana kewe ao ana mamanai teaure buakaka. Ko na tekeraoi n am bong aio te Tama ao ke karangaa nakoim Ana karaoiroi ma Ana kakabaia te Atua ae te Teniman Temanna. Am bau te Mauri te Raoi ao te Tabomoa.
Tariu ao maneu I kan tiba ngkanne ma ngkami teken nanou n taian wareboki n te bong aio n reitaki ma te boto n iango are te 'maiu n te itiaki ibukin te Uea'. Eng bon aio te rongorongo ae katuruturua nakoira Bauro n te bong aio are taku ba e rangi ni kookootiira ba ti na riki ba karea aika ti kainrouaki ma Kristo aika akea barekaia. Eng e tangiria Bauro ba ti na teimatoa inanon maiuakinan te itiaki ibukin Kristo. Ti boni kainnanoa ana buoka te Atua ba ti na katanaki ao ni kawakinaki man ana maamanai te riaboro ba e aonga n teimatoa ara anganano ao kaburean maiura nakon ao ibukin Kristo.
N te bong aio ao I kan reita te kantaninga ibukin te maiu inanon te itiaki ma te bai ae E reireinira iai Iesu n arora ngkana ti tataro. Ti kauringaki ba ti na aki reianau ke ni kaananau n ara tataro ba e a bon kaman atai kainnanora te Atua imain ae ti tabeki Nakoina. Ma te bai ae ti kainnanoia ba ti na butia Tamara bon kanara ae ti a tau iai, kabaraan ara bure ao katanara n tain te kaririaki. Ti riai ni bubuti ao n rauaki n taai nako ni kanara ae bon tau n te bong teuana ma teuana, ao tiaki ae rangi ni bati ae riaon are ti boni kainnanoia n te bong teuana. Nanona ba bon akea bonganan ae ti na kaikoi kaubaira ba a na bon riki ba katabetabeara ao tinetineara n ara kekeiaki. Ngkanne ibukin oin kainnanora are ti na bubuti iai nakon Tamara bon ti iaon baai ake a na kabua mairoura te maiu inanon te itiaki are bon te bure. Ti kainnanoa ana buoka te Atua ba E na kabarai ara bure n ai arora ngkai ti kabarai aia bure raora nakoira ao E na kawakiniira man taian kaririaki. Eng kanoan ara bubuti ake ti tabeki n ara tataro ae Tamara are I Karawa bon ibukin kateimatoakira ni maiu inanon te itiaki inanon ao ibukin te Uea.