Kanan Tamneira...

Tariu ao maneu ti riai ni kaineti unra ti nakon te riaboro are ngaia are aki toki ni buakanira ba ti aonga ni kabuanibai ao ni mate. Ti riai n tai nako n taratara ma n tataro ba ti na aki rotaki n ana kakiriwe te riaboro. Ba te tataro ngaia ae na kaitiaka ara taratara n tantani ao ara tantani e na kaitiaka ara tataro. Ba ngkana ti teimatoa n taratara ao ti na bon nora rokon te riaboro ba e na rin inanora ao ngkanne ti kona ni kaina te mataroa ba e na aki rin ao ni wetea aran Iesu ba e na katanira man taian kakiriwe. Ngkana ti wetea aran Iesu ba e na katanira ao e na bon roko Iesu ao ni urua mani kamaenakoa ana makuri ni kabane teuae buakaka.
Ti riai n taratara n tai nako ba e na aki kakiriwea ara iango te riaboro. Ngkana e kakiriweko te riaboro n am iango ao wetea aran te Kiristo ba e na urua ana makuri te riaboro ao e na kamaiuako. Inanon are ko wewete iai ao Iesu e na kaekako ni kangai; "Ao noria ae I a roko n tei irarikim ba Nna buokiko" Eng ngkana e a tia n roko ni buokiko Iesu ao ngkanne a na manga roko riki ana buaka te riaboro aika korakora riki nakon are mai maina ma tai raraoma ba ngkana ko wetea aran Iesu ao e na manga teirake ni buakana korakoran te ang ma te nao ni karokoa ae e a manga oki te raoi. Ti riai n uringa n tai nako ba bon raora n tai nako Iesu ao e kainnanoa ara onimaki irouna n tai nako ba e tauraoi ni kamaiuira ngkana ti wetea arana.