Kanan Tamneira...

Tariu ao maneu bon tiaki au taeka aikai ae I karioi ma bon banaan Iesu ni wewete nakoira ba ti na riki ba kain te kawa ae bou are bon Ierutarem ae boou are E a tia n urua ao E a manga kateia inanon tenibong. E weteira Iesu n te bong aio ba ti na teirake ao ti na kaina te maati nakon mwengara mi koaua are a tia ni katauraoia ibukira ae bon Ierutarem ae Bou. Aio are bon taekinna Bauro nakoira n te moani wareboki n te bong aio ba ai bon tiaki ngaira irua ao taan mamanganga ma bon taan ababa ao kain te kawa ae bou ma aomata aika tabu ni maeka n Uman te Atua, are kateaki iaon atibun te maninganinga ae Iesu n reitaki ma abaotoro ao burabeti. Iroun ao inanon Iesu ao ti a tia ni bane karaoaki ba ti na riki ba kain Uman te Atua ae moan te tabu mani mimitong.
Iroura ake tao iai te nanououa iroura ba iai te Atua ke akea ao ti riai n ongora karakin teuae Tooma te nanouua. Eng bon temanna ibuakoia ana abotoro Iesu are aki mena irarikiia raona ngke e kaoti Iesu nakoia abotoro imuin matena ao mangautina. Ba tera te bai ae riki irouia abotoro inanon bainikirinan ao taurakin Iesu ao matena iaon te kaibangaki? Eng a boni bane ni birinako abotoro ni kitana Iesu ma bon ti Ioane ao Nei Maria aika a tiku irarikina n ua ae mate iaon te kaibangaki. Ma Iesu e kaman taekini bai aika a na riki ba e na maraki ao ni mate ma E na mangauti imuin tenibong. Ma a bon aki kakoaua abotoro ma reirei ao a kanakoia raoia aine ba a na nora te rua ni mate ba iai Iesu iai ke akea. Ma tera ae riki n te ruaniate? Ngke a roko n te ruanimate ao a noria ba akea Iesu iai ma ti nori ninira kunikai ao a katibo ma te Anera are titrakinia ni kangai; "E aera ngkai kam ukoukora Iesu n aia tabo mate? Akea ba E a mangauti"
E nori aia nanououa abotoro iesu n aroia ni kakaea Iesu n te bao are aki kona ni mena iai are bon te ruanimate. Tao e bon ngare Iesu n ara nanououa e ngae ngke e bon ataia ba e aki kona ni kitaniira ba e bon mena irarikira n tai nako. Ma ti karaba Iesu n ana karatia ma ana nanoanga n aki katikuira n arora n nanououa ma n aki kakoaua ba e karekea te bai ae ti na bon aki manga nanououau iai ma ti na kakoaua. E kaoti Iesu nakoia abotoro ma reirei te kauatai ao e tuanga Tooma ba e na karini taboni baina inano bangabanga ikoakin rarikina ao e na aki manga kakewekewe ma E na kakoaua. Imuin ae karini baina Toma inanon ikoakin Iesu ao e taetae ni kangai;"AU UEA MA ATUAU" ao e toki ana nanououa ao ana aki kakoaua. Imuina ao e taetae Iesu ni kangai;"A kabaia riki ake aki norai ao a kakoaua".
Antai ae nanoniia Iesu n ana taeka aikai? Boni ngai ma ngkoe tariu ma maneu. Ti na ongo ana wewete Iesu nakoira n te bong aio n riki tan kakoaua ngaira ibukin mangutin Iesu aika ti tauraoi n uouoti ara kaibangaki ba ti na kaota iai ikoakin Iesu nakoia aomata nako; ikoakina are ngaia are ti a bane ni kamaiuaki iai. Ti na manga bane n uota te kakoaua ba e maiu Iesu n tauraoira n uouota ara kaibangaki ao n iriira Iesu.