Kanan Tamneira...

Te kamaiuaki nakon te aomata bon kanoan ana iango te Atua man moan karikara ao tiaki te bai ae a tiba iangoia. Te kamaiuaki tiaki te bai ae ti karekea ba boon muin ara raoiroi ma bon kanoan ana Berita n Akoi te Atua ibukira. E karikira te Atua ba ti na kona ni karokoa inanon rabatara aika mamate aio te aki mamate ngkai boni ngaira bon taian tamnei aika maiu ngkai e boni maeka te Atua inanora are bon te tamnei.
Te kamaiuaki ibukira bon kanoan te berita imarenan te Atua ma te aomata are e moanaki kamatoakina ma Aberaam, Itaaka, Iakoba ao are kakoroaki bukina iorun Iesu n rikina n aomata ao ni marakina, matena ao mangautina. E kaukai te kamaiuaki aio nakoira n ana onimaki Aberaam are kaotia ngke e tauraoi n kareana ao n tiringa natina ae te rikitemanna nakon te Atua. Ti kakoaua ngkanne ba tokira ni kabane n aron ana kantaninga te Atua bon te maeka irarikina i Karawa are boni mwnegara ni koaua.
Inanon rongorngon ana kamaiu Iesu are ti ongora n te ewnagkerio n te bong aio ao ti nora te moani bai ae kakawaki n te kamaiuakai are kan anganira te Atua. Bon te kamiauaki man ara bure are kaotia ikai ba oin te kamaiuaki bon te maiu n Atua are inanora. Ti riai ni bane ngkanne ni kabanei ara tai ibukin karekean te kamaiuaki n te tamnei are boni ngaia ae na anganira kororaoin te kamaiuaki are bon te Maiu ae Onraken te Maiu. Ti ria n aki riki ba tan taromauria te kora ma te tirewa are boni baai aika e karoai te aomata n tabonibaina. Eng ti riai n kabanei ara tai ibukin bain eta ake aki mamate. Ti riai ni kabanei korakorara ma maiura ibukin te roko i Uman te Atua i abaia akana a maiu. Ngkana ti kabanei korakorara ibukin baai aika karaoaki iroun te aomata ao ti na manga bon bane ni katotongi baai aikanne n akea te miau inanoia ba baai aika a mate. Ti na tataro ba ti na bane ni karekea te maiu ae aki totoki i Karawa ba e oanga ni kororaoi inanora Ana Beita n Akoi te Atua.