Mauri tariu ao maneu n ana tangira te Uea,
Ti karautaeka ba e a manga tiba maiu ara internet n te bong aio imuin aki maiuna inanon teniua tabun te wiki. E raba te Uea ba e manga tia ni buokira ni manga kaoka maiun ara website.
Ao aio ngkanne ara kanoa ibukin te bong aio.
N te bong ao I kan marorokina aron mimiakinan Iesu irouia te koraki ao man taku; Tiaki ngkoa teuaei (Iesu) natin Ioteba te Kabenta? Tariu ao maneu ti a kataia ni kananoa te kikina aio nakon Iesu ae bon natin Ioteba are te kabenta. Inanon te baibara ao iai uoman aomata ae araia Ioteba; temanna are natin Iakoba are kaboakinako irouia tarina nako Aikubita ao e a manga riki ba ana kowana Barao are tabeakina kawakinan ao tibatibakin te wiita n tain te rongo. Ioteba are bon bun Nei Maria are te tia kawakina Iesu ao Nei Maria ke te tia kawakina kaubain te Atua ae bon te Bwerena ni Kamaiu. Tera te bai ae ti noria n nakoaia uoman aomata aikai? I taku ngai ba a reitaki karaki aikai iaon te muioko ni kawakina te kaubai ae kakawaki ae karekea te kamaiuaki nakoia aomata. Are te moan bon te wiita ae anganga te maiu nakon te rabata ae rangi ni kakawaki n tain te rongo are taona Aikubita inanon itiua te ririki. Ao Ioteba are ana kainrou Nei Maria e muiokoaki ba e na kawakina Iesu are e roko i aonteaba ba e na uota te kamaiuaki nakon aonnaba man te bure are ti a karaureaki nako iai ma te Atua. E a riki Ioteba aio ba te tia kawakina Natin te Atua are roko ba e na kaoka te aro n natinaki ao te kamaiuaki nakon tamneira are boni ngaia te oinibai ba maiun te Atua inanora.
Tera ngkanne tingara ae kakawaki man te rongorngo aio? Teuana tingau ae kakawaki bon te tauraoi n anga boni ngaira ibukin kawakinan te muioko are ti anganaki iroun te Atua are ti ataia ba ti anganaki ibukin karekean te maiu nakoia raora. Ti riai ni butimaea te muioko aio ao n ataia ba bon aio nanon te Uea ae kakawaki ba te anganga te maiu nakoia aomata. Ti riai n aki karimoa aron reken arora man taian muioko aika ti anganaki ma e riai ni moanibai ana kantaninga te Atua. Ti na uringa ba ti na kona ni karekea te maiu ti ngkana ti tauraoi n anga te maiu nakoia aomata. A na bon akea te maiu iroura ngkana ti a bon ti iangoira naba n tai nako.