Kanan Tamneira...

N te bong aio ao ti kauringa te toa ae kakannato ae onikan taran Iesu n te maunga are Tabora. Tariu ao maneu kanga tera raoi ana kantaninga te Atua ngkai E kataua ba Iesu ae natina E na oti man noraki mimitongina n Atua n te tai aio irouia abotoro? I taku ba bon uoua bai aika ti anganaki ao e tangira te Atua ba ti na karekei n te toa n te bong aio. Teuana bon kaotan Iesu ba boni Ngaia Natin te Atua ae maaka mani mimitong ae bon ana bai n ti Ngaia te neboaki ao te taroauriaki n aki toki. Inanon te onikaki aio ao ti bane n anganaki ngaira ni kabane te kona n nora te kantaninga are taekinna Bauro ba "ti na bane naba n onikaki n rabatara aika a mangori aikai nakon katotongan Iesu n Rabataba n Atua ae mimitong i Karawa.
Ti kakoaua ngkanne inanon te toa aio oin te muioko ao te kantaninga iroun Iesu ni kanakoana iroun Tamana- ba E na uota te kamaiuaki nako aonteaba. Bon uotan te kamauiaki aio ae moanibai iroun Iesu ao are e moanaki n rokona i aonteaba ao e kakoroaki bukina iaon te kaibangaki are tauraki, e maraki ao e mate iai Iesu. Eng bon ana tauraoi Iesu ni rinanon te mate are karokoa te kamaiuaki nako aonteaba ao bon mangautin Iesu are are e urua ao e kataea ana kai te mate. Ikai are ti nora kakoroan nanon te koroboki ae kangai ba "ngkai e a tia n roko te mate iroun temanna te aomata (te moan Atam) ao bon inanon naba temanna te aomata ke te kauoman n Atam (Iesu Kristo) ae ti a bane n anganaki Irouna te mangauti ao te onikaki nakon te maiu ni mimitong. I aon te aba aio ao ti weteaki iroun te Tama ba ti na kina Natina ae Iesu ao ti na ongo Irouna ba ti aonga ni karekea te kamaiuaki ao te maiu ni mimitong ae akea tokina i Karawa. Tariu ao maneu te kamaiuaki e moanaki iroun Iesu iaon te kaibangaki ma ti na mangauti nakon te mimitiong ngkana ti ongo ana taeka Iesu. Te ongo n ana taeka Iesu bon te tauraoi ni katotonga Iesu ni uota ara kaibangaki ao ni mate i bon iroura n tauraoi ni karimoa karaon nanon Iesu ao te karaoi makuri n tangira nakoia tarira ao manera.