Kanan Tamneira...

Tariu ao maneu e moanna n uakaan te toa ae kakawaki ibukira are bon uotakirakean Nei Maria ae Tinan te Atua nako Karawa. Aio bon te kanikina ae moan te kakawaki are e tei ba kanga Nei Wirara i Karawa ba kaotan ana ana Berita n Akoi te Atua ibukira ba E tauraoi n ongo ara kainnano ngkana ti bubuti Nakoina ma te onimaki ba boni Ngaia Tamara ae moan atataiaomata man akoi. Inanon Nei Maria ao ti ataia ba e a roko ana tangira ao nanoanga te Atua ni maeka ibuakora ao ti kakoaua ana wewete te Atua nakoira n tatabemanira ba ti na rinnako inanon maniban te kamaiuaki are bon ara bai ni koaua ngkai ti a riki ba nati ngaira iroun Iesu ni marakaina ao matena iaon te kaibangaki ao mangautina nakon te mimitong.
Tariu ao maneu kakoauan te natinaki aio bon Nei Maria are a tia n rineaki iroun te te Atua te Tama ibuakoia aine nako ba e na riki ba Tinan Natina ae te Rikitemanna ao are E a manga anganira Iesu iaon te kaibangaki ba tinara ngke e kangai nakon Ioane are e tei ibukin te Ekaretia ; "Aio tinam" ao nakon tinana; "Aio natim".
Eng bon akea te anga ae ti kona n nanoaua iai ibukin tangirara iroun te Atua ao ana kantaninga ibukira ba ti na bane ni maeka ma Ngaia i Karawa. Ma ai kawara ngaira ngkana arona ba ti aki roko ikekei ma ti a nako n te tabo ni mate are akea tokina? Tariu ao maneu ti bia ota raoi ba aki rokora i Karawa bon te bai ae ti karekea ke muin ara rinerine ae ti karaoia ao tiaki ana motikitaeka te Atua nakoira.Ti riai n nora maiura aio ba kanga ai aroia Iteraera ake a mananga inanon te rereua nakon te Aba ni Berita are bon Kanan. Ti na bane ni kekeiaki ao ni kananomatoaira ba ti na bon roko n tokin kawaira are boni mwengara mi koaua are bon iteran te karanga ae te Ioretan are te iterana are bon Ieruterema ae Bou are akea te bong iai, akea te maraki ao te mate iai ma bon ti te kimareirerei ao te kabaia ae akea tokina. Ti bia reke ngaira aika ti weteaki ngkai iroun te Atua ba temanna ibuakoia aika rineaki ba ti na baunaki n te mimitong n aron are ti nang manga kauringa n ana toa Nei Maria ae nang roko ni uotakirakeana ao baunueanakina i Karawa.