Ti kauringaki n te bong aio ba ti riai n tai nako ni kairaki inanon te onimaki ao tiaki te iango n aomata. Te Uea e bon reireinira n te bong aio ba ti riai n aki irarang iroun te riaboro riki inanon baai aika ti riai ni karaoi ibukin kamaiuaia aomata. N te moan wareboki ao ti nora aroia Iteraera ni ngurengure nakon te Atua man aki tauraoi n onimakina te Atua ae boni Ngaia ae raonira ao e tauararuaira n taai nako. E ngae ngke a tia n otinako mai Aikubita te nati n Iteraera ao a tia ni kainaomataki man te tautoronaki irouia I Akubita, e bon teimatoa naba irouia te kan okira Aikubita ibukin tatauraoin kanaia ma nimaia e ngae ngke a riki ba toro. Irouin te tia kairia Iteraera are Mote bon iai naba te nanouoa irouna n aki onimakinna ba e kona n tinako te ran man te baa ke atibu. Ai bon te iango n aomata aio ba e na kanga ni kona n tinako te ran man te atibu.
N te ewangkerio ao ti nora katoton te iango n aomata aio iroun Betero are rawa ana iango ni butimaea are Iesu ae bon Natin te Atua ae maiu E na maraki man tiringaki ibukin kabaraan ara bure ao kamauiakira. Eng e bon un Iesu nakon Betero man tuanga ba e na kakaroa ma Ngaia n ana iango tatan are irouna. E bon aki kan butimaea te kaririaki Iesu are e na aki kakoroa bukin rokona ba E na kainaomataira man te bure.
Tariu ao maneu ti riai n onimaki n tai nako ba inanon ara borau aio ao te Atua e na bon tararuaira ao e na anganira buokara aika ti kainnanoi ba ti aonga karekea te maiu ae aki totoki ao ti aonga naba ni karokoa te kamauiaki nakoia aomata nako.Ti na butia te Atua ba e na kakorakorai ara onimaki Irouna ao inanona ba ti na kona ni karaoi bai nako ibukin neboan ao kamoamoakin te Atua ae maiu ni koaua n tai nako.
Kanan Tamneira...
Buokira Tamara ba ti na teimatoa n onimakiniko
- Details
- Written by Uriam Timiti