Kanan Tamneira...

Tariu ao maneu ti a manga kauringaki n te bong aio ba ti riai ni kaburei maiura nakon Iesu ngkana arona ba ti kan karekea te Maiu ae akea tokina. Ao ngkana ti kaburei maiura ao nanona ngkanne ba ti angan te Uea maiura ba e na tautaeka iai ba e aonga ni karaoaki Nanon te Uea iroura ao inanora ao ti maiu ibukin te Uea. Ngkoananoa ao ti kauringaki ba ti riai n aki kataua te iango n aomata ba e na kairi ara waaki ao ara makuri ma ti riai n tai nako ni kairaki n ana iango te Atua ke iroun te Tamnei ae Raoiroi. Ba ngkana ti kairaki ian ana kairiri te rabata ao ti na bon tautoronaki iroun teuare buakaka ao ti na reke ba ana toro te riaboro ngaira ae na kairira nakon te mate ae akea tokina. Ngkana ti kan karekea te maiu ae akea tokina ao e tuangira Iesu n te bong aio te bai ae ti riai ni karaoia; ti na kakeaira i bon iroura, ti uouota ara kaibangaki ao ti na irira Iesu. Ngkana ti kakeaira i bon iroura ao nanona ngkanne ba ti aki ukoukora moa are bon oin nanora ma ti ukoukora ke ni kakaea are nanon te Uea. Eng e tuangira Iesu ba kingin ao mataroan karekean te maiu ni koaua bon ti teuana ba te kaibangaki. Ao tera te kaibangaki? Bon taian rawawata, aoraki, kainnano, maraki ao kataaki ake ti anganaki ke ti kaitibo ma ngaia inanon maiura. N ai aron te koora are riai ni kabuokaki ba e aonga n nako te bareka ma iai ao e na tiku te raneanea ao te tikiraoi ao ai bon arora naba. Ti na rikirake inanon te raoiroi n ai aron te Atua ngkana ti rinanon te kaibangaki. Ti riai n tauraoi ni butimaea te kaibangaki ao n aki bakataeia ba bon ti ngaia kawaira nakon te maiu are kan anganira Iesu. Bon ti inanon ao rinanon te kaibangakia ae ti kona iai ni kaburei maiura nakon Iesu ba ti aonga ni karekea te maiu are Onraken te Maiu are bon te Maiu n Atua.