Kanan Tamneira...

Tariu ao maneu ti uringa ngkoa ana taeka ni kakabaia Iesu are e taekinna ana reirei ae moan te kakawaki mai iaon te maunga. Ti uringa are teuana mai buakon ana taeka ni kakabaia Iesu e bon kangai;”A kabaia akana mangori man nimamanei ba aia bai te Abanuea ae Karawa. N ana kabarabara temanna te tama ao e taekinna ba taekan ni kakabaia aikai a na bon reke iroura ngkana ti karaoi aekan makuri ae a na ringa nanon te Atua ngkana ti karaoi. Ai ngaia are te bai ae kakawaki ngkana ti kan karekea te kaoiroaki mairoun te Atua bon te kona n atai aekan makuri aika ti kona n ringa iai nanon te Atua ngkana ti karaoi ao te tauraoi ni karaoi makuri aikai tiaki ibukin kabaiara ma ibukin kakukureiean nanon te Atua. Eng teuana te makuri ae ti kona n ringa iai nanon te Atua bon te tauraoi n riki ba kanga ai aoria ataei aika uarereke aika mangori man nimamannei ao n nanorinano. Te nanorinano bon te tauraoi ni karimoai aia eti tabeman ao te tauraoi ni karaoi makuri aika a na kukurei iai nanoia tabeman. Te nano n ataei bon te tauraoi ni katikui ara onimaki ma arora ni kabane inanon baia tamara, are nanona ba ti muiokoia ara karo ke aika ikawai ba a na kawakinira ao a na tabeakinira ni kainnanora ni kabane. Ngkana ti kan riki ni kakannato i Karawa ao ti na tauraoi ni butimaia ataei ao n tararuaia ni kainannoia nako. Ti riai n aki bainikirinia ataei ao ti riai ni karineia ngkai a kaota ubun te Atua nakoira n tai nako. Angin te tai ao ataei a kainnanoa ara ibuobuoki ma ara kakawakin ao ibukin aio ao a kai rotaki n taian kanganga ibukina ba a kakantaninga irouia tabeman ibukin buokaia ao kainnanoia. Tariu ao maneu ti riai n akoia ataei ao ti na reirei mairouia ba boni ngaia tan anganira ara tai n akoa ao n tangira Iesu inanon maiura aio.