Kanan Tamneira...

Te bong aio bon ana toa te tama ae St Mary Maxmilian Kolbe. Bon aio te tama ae kain Poland are kaburea maiuna nakon Nei Maria ao imain tokin maiuna ngke a babureaki i Tiaman ao e anga nanona n onea muin temanna are na tiringaki irouia tautia n Tiaman. Ngkai bon akea tabena ba akea natina ao e onea muin te raona ni kabureaki are temannangkai bon iai ana utu ake a tiku imuina i Poland. Te Santo aio e kakannato ibukin kabutan te rongorongo are raoiroi ibuakon taian kanganga ma te bainikirinaki ao ibukin naba tauraoina n anga maiuna ibukin raona. N te bong aio ao e kauringira ana taeka Iesu ae ti riai n uringa n tai nako ao n onimaki iai ngkana ti bubuti ana buoka te Uea. Ba “ike a botaki iai uoman ke teniman ni bubuti n arau ao te koaua ba I bon mena ni koaua ibuakoia ao N angania te bai ae a bubuti. Tariu ao maneu I taku ba te reirei ae moan te kakakwaki ibukira n te bong aio ba ti onimakina te bai ae tuangira Iesu ba E na bon ongo ara bubuti ngkana ti botaki ngaira uoman ke teniman ni bubuti te Uea. Te bai ae kakawaki ikai bon te bubuti n tataro ma te nano ao te iango ae ti teauana. Bon aio kingin te korakora ae ti riai ni kabongana n tai nako ba ti na kakouaa ba a na kaekakki ara bubuti iroun te Uea ngkana ti onimaki ma nanora ae ti teuana. Ti kainnanoia ba ti na reitaki ma tarira ao manera ao ti na karekea te katiteuanaaki n nanora ao n onimakina te Atua ba e na kaekai kainanora ao ara bubuti. Te bai ae na riki ba korakorara n tai nako bon te nano ae ti teuana ke te katiteuanaaki. E na bon reke te nano aio ngkana ti kakeaira i bon iroura, ti uouota ara kaibangaki ao ti irira Iesu. E na bon aki kona n reke te nano teuana iroura ngkana a kakaokoro aomata aika ti iririia ao ngkana ti toro irouia toka aika uoman.