Kanan Tamneira...

Ni kaitara ma ana te toa ae ‘Uotakirakean Nei Maria nako Karawa’ ao ti reitira ma tarira ao manera ni Kiritian i aonnaba ni karaba ao ni kamoamoa te Atua ibukin kororaoin te kamaiuaki ae anganira rinanon Nei Maria ae a tia n rineia ibuakoia aine nako ba e na riki ba Tinan Natina ae Iesu are e bungiaki, e maraki, iaon te kaibangaki ibukin kabaran ara bure ao manga karikara ba nati ngaira imuin te karaurenakoaki n aia aki ongotakea ao aia bure ara moan karo. Ti kakoaua ba rinean ao nnen Nei Maria inanon te Babaire ni Kamaiu aio bon te bai ae a kaman iai mai moana ao tiaki te bai ae manenanti n reke. Nei Maria inanon ana kaeka ae mangori are “ana toro te Uea ae mangori ngai; E na karaoaki nakoiu n ai aron Am Taeka” ao imuin ruonakina ni maakan Teuare moan te Rietata inanon te Tamnei ae Raoiroi, e riki ni koaua ba tinan te Atua ngke e riki n iriko inanona Iesu ao e a maeka te Atua ibuakora. Bon Nei Maria ae a tia n angan Iesu arona n aomata inanon birotona ao bon mairoun Nei Maria are a reke iai kinakin Iesu ba kanoan Tawita are a kaman taekinna burabeti ba e na otinako mai iai te Messia ae te tia kamaiua aonnaba. Ibukin katauraoan Nei Maria n riki ba tinan Iesu ae te Atua ao e anganaki te kaonrakeaki n te karatia n aron are taekinna te akanera are Kabiriera ngke e nikira ana kamauri te Atua nakon Nei Maria are kangai: ‘Ko na mauri Maria ae ko onrake n te karatia”. Ngkai e onrake Nei Maria n te karatia ao nanona ngkanne ba e bon onrake Nei Maria n te raoiroi, te tamaroa, te itiaki ao te kororaoi. N te 1854 ao Pope Pio IX e kamatoa ao e katanoata kanoan te onimaki ba Nei Maria ae te Baretenia ae moan te Tabu e a tia n anganaki n ana karatia te Atua ae kaonoti nakoina ao n uan te kamaiuaki are na uotia Iesu Kristo, te katanaki man barekan nako te bure ae orikinare ke te bure n riki. Boni man te koaua are te Riki n Immakurata are a kabarabaraki iai Nei ba e Imakurata ke e itiaki. N te toa ae uotakirakean Nei Maria n te 15 Aokati ao ti a kakoaua iai kamimitongan ao baunuenakin Nei Maria irarikin Iesu i Karawa ni kaotaki ao ni kamatoaki iai ba boni ngaia Tinan te Atua. E kamatoaki kanoan ana koaua ao ana reirei te Ekaretia aio iroun Pope Pio XII n 1 November 1950 ba Nei Maria ae Tinan te Atua ae e Imakurata ao e aki boo n te bure e anganaki te kamoamoaki ae okoro ngke e uotakirakeaki rabatana ao tamneina nakon kororaoin te mimitong i Karawa. Eng, bon aio kanoan te onimaki are katuruturuaki n te kanimaua ni miterio ni mimitong ba Nei Maria ae Tinan te Atua ao tinara naba e na buobuokira ba ti na teimatoa inanon te karatia ba ti aonga ni katotongnga naba ni baunueanaki n te mimitong i Karawa.