Kanan Tamneira...

Tariu ma maneu bon ti teuana ana kantaning te Atua ibukira ba ti na riki n ti teuana ngaira ma te Atua n aki totoki. Bon aio te miterio ae kabarabara nakoira aron ma anuan te Atua ae te Teniman n Temanna. Ba teniman te beretona inanon te rabata ae ti teuana ke Temanna te Atua. Bon aio te miterio ae kabotaua aron te reitaki imarenan te Atua ao ana botanaomata. E taekinaki n te ewangkerio n te bong aio aron te riki n ti teuana n aron are ti noria n ana kamaiu te Atua nakon te botan aomata ni moanaki mairouia ana karo Aberam ake a maeka ngkoa n te buakoako inanon te roo are E kaotinakoia maikanne nako rarikin te karanga ba e na riki ba ana botanaomata ao Atuaia ngaia. Imuina ao a manga kawakinaki ana botanaoamata te Atua iroun Itaaka ao imuina iroun Iakoba ao imuina iroun Mote ma Aron are a kaotinakoia Iteraera mai Aikubita ao ni karokoa Iesu are bon natin te Atua are a bon roko Rabatana i aonteaba ba e na maraki mani maraki ibukira iaon te kaibangaki ba ti aonga ninj abne ni kamaiuaki man ara bure ao ni manga riki ba nati ni koaua iroun te Tama. E bia mamatata raoi ni koaua ba inanon te Berita n Akoi imareman te Atua ma ana botanaomata ao bon iai te kabeakiiai n aki toki n te tangira n te aro are ti te irikona ngaira ao tiaki uoman ngaira. Te bai riki teuana inanon te boraraoi aio ba te nim n ti teuana ao te aki kona ni maenako ba n ti te mate. Te kabanea ni bai ae kakawkai n te reitaki aio imarenaia uoman bon te Atua are maiu inanon te tangira ke reitaki anne n ai aron are a tia ni karaoia te Atua mai iroun Aberam nakon Mote are bon aki kona ni manga tannako te Uea ma boni ngaira aomata ae ti a manga kan raurenako ma te Atua. Ao tera ae na riki n te mate? E na bon maenako te rabat ma te tamnei ao ao te Tamnei are bon maiun te Atua inanon te aomata boni ngaia are na karokoira ni kororaoin te katieuanaki n te nano n ai aron te Teniman n Temanna. Bon miterion maiura aio tariu ma maneu bon te riki n ti te irikona ke te rabata ae titeuana.Ti bane ni weteaki inanon maiura aio ba a na bane n riki ara reitaki ma te Atua ba kanga ai aron te te reitaki ao te kabaeaki n te tangira imarenan te maane ao te aine inanon te takaramentu ni mare are bon te riki n ti te irikona.