Wiki 17 Kanimabong
Warekan ana Boki te burabeti ae Ieremia. 26: 1-9
Ngke e moa n tei n uea Ioakim ae natini Iotia ae ueani Iuta, ao e roko ana taeka te Uea irouni Ieremia ni kangai: “Aikai ana taeka te Uea: Tei i nanon on ana Temboro te Uea. Ko na taetae nakoia aomata ni kabaneia aika kaini kawani Iuta, aika roko n taromauri n ana Temboro te Uea, ao ko na taekin taeka ni kabane aika I a tia n tuangko ba ko na kaongoia, n aki katuka te taeka teuana. Tao a na ongo, ao a na bane n rairaki mani kawaia aika bubuaka; ao ngkanne e na bitaki au iango ni karekekai ae I tabe ni baireia i bukini buakakan aia makuri. Ma ngaia ae ko na kangai nakoia. Aikai ana taeka te Uea: ngkana kam aki ongo irou; ngkana kam aki kawakina te tua ae I kateia i matami; ngkana kam aki kakauongo aia taeka au tabonibai aika burabeti aika I aki toki ni kanakoia nakoimi, aika kam aki ongo irouia, ao N na karika te Temboro aei ba ai aron Tiro, ao N na karika te kawa aei ba te bai ni kamaraia i bukia botanaomata ni bane i aonaba.”
A bane n ongo berebitero ma burabeti ao te koraki, ngke e atonga taeka akanne Ieremia i nanon ana Temboro te Uea. Ngke e a tia n taekini bai ni kabane Ieremia ake E tuangnga te Uea ba e na taekin nakoia te koraki, ao a taua berebitero ma burabeti; ao a taku nakoina; “Ko na mate! E aera ngkai ko taetae ni burabeti n aran te Uea ni kangai: E na riki te Temboro aei ba ai aron Tiro, koraki i nanon ana Temboro te Uea.
Te Taramo 69: 5,8-10, 14
Kaekana: Kaekaai, te Uea, ba ko bati n akoi.
A maiti nakon iranatuu, Akana ribaai n akea bukina.
E riaoni korakorau maitia, Akana kewe ni bukinai.
N na kaoka te bai ae I aki anaia. K
I taetaebuakaki i bukim, E rabuna moau te mama,
Te irua ngai i bukia tariu, Ao te ianena i bukia natin tinau.
I mate n tangira umam, Ao a bakarai taetaebuakakim. K
Te Uea, I tataro nakoim, Ngkai e riai ba N na kangai:
Te Atua, kaekaai n am akoi ae ababaki, ba ko kakaonimaki ni kamaiu. K
Alleluia, alleluia
Boni Ngai te kawai, te koaua ao te maiu; Akea ae nakon te Tama n aki rirou. Alleluia.
Euangkerio
Warekan ana Euangkerio Mataio..13:54-58
E roko Iesu I abana, ao E reireinia aomata n aia tinakoka. A mimi, ao a taku: “Ai mai ia wanawanana ma ana kakai? Ba tiaki natin te kabenta Teuanne? Ao tiaki bon tinana ae atongaki ba Maria? Ao tarina Iakobo, Ioteba, Timon ao Iuta? Ao manena, tiaki a bane ni mena I buakora? Ao ai mai ia arona akanne ni kabana?”
Kanga a mama n taekana. Ma E taku Iesu nakoia: “Akea te tabo ae e na kakeweaki iai te burabeti ba ti i abana ao n ana auti.” Ao E aki kabatiai ana kakai n te aba arei, I bukin rawaia ni kakoauaa.
__________________________________________________________________
Tibatiba: E akoi man nanoanga te Uea
Tariu ao maneu e roko Iesu ba te aomata ae moan te mangori ao bon akea atakina ao kiankina ae boni Ngaia ae Natin te Atua. Inanon kororaoin te tai ngke a koro 30 ana ririki ao e moana ana makuri ni mitinare Iesu ni kaotia ba e roko ao e kanankoaki iroun Tamana ba e na kamaiua aonaba ni mate ibukia iaon te kaibangaki ao ni kaota Rabatan ana tangira te Atua ba a aonga ni kamaiuaki ao n roko n te Abanuea Karawa.
E rereinia aomata Iesu inanon te maka ma te korakora ba e mamakuri te Tamnei te Atua i nanona.A mimi aomata irouna ni wanawanana ma karabakauna riki ngkai e bon bungiaki i Beterem mairoun Ioteba ae te kabenta ao Nei Maria.
N te moani wareboki mairoun te burabeti ae Ieremia ao ti ongora aron ana kaetieti te Atua tunga Ieremia nga ba e na taekina ana taeka n akea teuana ae na tiku ba aonga n ongo aomata ao n rairi nanoia ngkana a kan bitaki. Ba ngkana a biti nanoia Iteraera ao e kona ni bitaki nanon te Atua ni karekekai nakoia te nati n Itereara ibukin aia aki ongotaeka ao n nanoagaia n aki karekei kaia.
Tariu ao maneu ti riai n rairi nanora ngkai naba riki ngkai iai ara tai ba ngkana a toki maiura ao ti aki rairi nanora ao a na bon akea ara tai ao ti na kaitara ana motitaeka te Atua nakon te mate ae akea tokina..