Wiki 18 Katenibong
Warekan ana Boki te Burabeti ae Ieremia. 31:1-7
N na riki ba Atuaia barongani Iteraera ni bane ao a na riki ba au botanaomata. Bon ana taeka te Uea. E kangai te Uea: A bara aia bure n te rereua uake a aki reke n te kabang. E a mananga Iteraera ni karekea motirawana. E kaoti te Uea nakoina mai ike e raroa:
I tangiriko n te tangira ae akea tokina, ai ngaia ae e teimatoa akoakim irou. I a manga kateiko, ao ko na manga tei, ngkoe te ataeinaine ae Iteraera. Ko na manga uniki kainikurebe i aoni maungan Tamaria (A ununiki tan ununiki, ao a na taia te ua).
N te bongina, ao a na takarua tan tantani i aon ana maunga Eberaim ni kangai: “Teirake! Ti na waerake nako Tion, nakon te Uea ae Atuara.”
Ba E kangai te Uea: Takarua ni kukurei i bukini Iakoba, kamoamoa te moa ni botanaomata! Kanenei banami! Nebonebo! Takarua ni kangai: “E kamaiua ana botanaomata te Uea, ae nikirani Iteraera.”
Te Taramo Ieremia 31: 10-13
Kaekana: E kawakinira te Uea n ai aron ana nanai.
Botanaomata, ongora n ana taeka te Uea, Kaongoi abamakoro aika raroa, ni kangai;
“Teuare kamaea Iteraera, ao E na botia, E na kawakinna n ai aron te tia kawakintibu. K
Ba E manga kaboa Iakoba te Uea, E kamaiua mairoun teuare korakora.
A na kanenei nakon ana karaoiroi te Uea, Nakon te uita, te uain ae menai ao te ba,
Nakoia tibu ma kao. K
E na ruoia ma ni kimarerei te ataeinaine, a na kabaia kara ma ataei,
N na oniki tangia nakon te kukurei, N na kabebeteia ma ni kakabaiaia
Imuin rawawataia. K
Alleluia, alleluia.
Te Uea, kauki nanora n ongora n ana taeka Natim. Alleluia.
Euangkerio
Warekan ana Euangkerio Mataio…15: 21-28
E mananga Iesu nakon te aba ae i rarikin Turo ma Titon. Ao e roko man te aba arei temanna te aine ae te I Kanaan, ao e takarua nakoina ni kangai: “Te Uea,ae natin Tawita, nanoangaai: e rangi n aki karauaki neiere natiu iroun te taimonio.” Ma E bon aki kaeka naba teutana. A kania Iesu ana reirei ao a butia ni kangai: “Ani kanakoa te aine anne ba e aki toki n takarua n rimuira.” E taku Iesu: “I aki kanakoaki i bukin temanna ma ti i bukia tibu aika bua i buakoia Iteraera.” Ma e roko te aine arei, ao e bobaraki i matana, ao e kangai: “Te Uea, ko na buokai.” E taku Iesu nakoina ngkanne: “A aki riai n anaki kanaia nati n tewenakoaki nakoia kiri.” Ao e kangai neierei: “E koaua, ma a amarake kiri n tamruru aika baka man aia taibora aia toka.” E taku Iesu ngkanne: “Neiko, ngaia e ababaki am onimaki; e na karaoaki nakoim n ai aron nanom.” Ao e maiu natina n te tai naba arei.
Tibatiba: E kamaiua ana botanaomata te Atua