Wiki 18 Kaabong
Warekan ana Boki te Burabeti ae Ieremia. 31: 31-34
E kangai te Uea: A nangi roko bong ike N na katea iai au berita, ae bou ma te utu ae Iteraera (ao te utu ae Iuta). Tiaki aron au berita are I karaoia ma aia bakatibu, ngke I tau bai ani kaotinakoia man te aba ae Aikubita. Ba a urua te berita anne, ae au berita; ao I kaotia nakoia ba boni Ngai te tia kairiia. Bon ana taeka te Uea. Aei, bon te berita ao N na karaoia ma te utu ae Iteraera i muini bong akanne. Bon ana taeka te Uea. N na unika au tua i kabin nanoia N na koroia i nanoia. N n ariki ba Atuaia, ao a na riki ba au botanaomata. A na aki manga bae n reireinia temanna iroun temanne, ma n tuatua ni kangai: “Reireingkami atakin te Uea.” Ma a na bane n ataai, mairouia ataei ni karokoia ikawai. Bon ana taeka te Uea. Ba N na kabara aia bure n aki manga uringnga.
Te Taramo 51:10-15, 18-19
Kaekana: Atuau, karika nanou ae itiaki.
Te Atua, karika nanou ae itiaki, Karina te iango ae matoa i nanou;
Tai karaoaai ma Ngkoe, Tai ana mairou tamneim ae raoiroi. K
Kaoka nakoiu kabaiani kamaiuau, Kamatoa irou te nanomaka,
Ba N na reireinia tani bure am kawai, Ao a na okiriko akana buakaka. K
Ko aki kukurei n te angakarea, Ko rawa n te karea ni kabuokaki.
Au karea ngai, te nano ae uruaki, Ko aki rawa nakon te nano
Ae uruaki ae raraoma. K
Alleluia, alleluia.
E raoiakina aonaba te Atua I nanoni Kristo; Ao E angira taekan te raoi. Alleluia.
Euangkerio
Warekan ana Euangkerio Mataio..16: 13-23
E roko Iesu n te aba ae Kaitareia Biribi, ao E titirakinia ana reirei ni kangai: “A taku aomata ba antai Natin te aomata?” Ao a kaeka ni kangai: “A taku temangina ba Ioane te tia Babetito, ao temangina ba Eria, ao a taku tabeman ba Ieremia ke temanna mai buakoia burabeti.” E taku Iesu nakoia: “Ao ngkami, kam taku ba antai Ngai?” E taetae Timoni Betero, ao e kangai: “Bon te Kristo Ngkoe, ae natin te Atua ae maiu.” E kaeka Iesu ni kangai nakoina: “Ko a kabaia, Timon ae natini Ioane, ba e aki kaota anne nakoim te iriko ma te rara, ma bon Tamau are I karawa. Ao Ngai I taku nakoim, ba Betero ngkoe, ao i aon te ba anne N na katea au Ekaretia; ao na anganiko kingin te Abanuea ae karawa; ane ko na kabaea i aon te aba, ao e na bae naba I karawa; ane ko na kabara i aon te aba, ao e na bara naba I karawa.” Ngkanne E kamatoa ana taeka nakoia ana reirei ba a na aki kaongoa temanna ba te Kristo Ngaia. Ngkanne E moa ni kaotia Iesu nakoia ana reirei ba E riai n nako Ierutarem, ba E na bati ni maraki iai irouia unimane ao mataniwia berebitero ma tani koroboki, ao E na kamateaki ao E na mangauti i muin tenibong. Ngkanne e katikia Betero, ao e boaia ni kangai: “Te Uea, ke E kawakiniko te Atua mai iai! E na tai karaoaki anne nakoim!” Ma E rairaki Iesu, ao E taku nakoni Betero: “Nako akuu, Tatan! Ko kautabaai, ba am iango tiaki ana iango te Atua, ma bon aia iango aomata!”
Tibatiba: Te Atua anganai te rairannano ni koaua ao kaitiakai