Wiki 19 Kauabong
Warekan ana Boki te burabeti ae Etekiera. 2: 8; 3:4
Ngai Etekiera, I ongo te bana ae taetae ni kangai: “Te nati n aomata ongora ni baika N na tuangko; tai rawa n ai aroia ngaia aika tan rarawa. Kaurea wim, ao kana ae N na anganiko.” I taraia, ao iai bain te aomata ae aoraki nakoiu, ae taua te nira ni boki. E takinna i matau, ao iai te koroboki i nanona ao i tinanikuna; e koreaki ae kangai: “Baebaeti, tanginiwenei ao tangitang.” E kangai nakoiu: “Te nati n aomata, ane ko anganaki ao kanna; kana te nira ni boki aei, ao nako taetae nakon te utu ae Iteraera.”I kaurea wiu, ao e kaamarakeai n te nira ni boki ae I anganiko aei.” Ao I kanna, ao e karewerewe i nanoni wiu n ai aron te meri. Ao ngkanne e kangai nakoiu: “Nakon te utu ae Iteraera, ao tuangia au taeka"
Te Taramo 119: 14, 24, 72, 103, 11, 131
Kaekana: E karewerewe am taeka i nanoni wiu.
Boni kawain am tua kabaiau, Ao tiaki taiani kaubai ni bane.
Kukurein nanou, bon am tua; Tani kairai, bon am moti. K
E kakawaki riki irou te tua ae mai wim, Nakon te tirewa ma te koora.
E karewerewe riki am moti, Nakon te meri i nanoni wiu. K
Bon tibangau am moti, Ao boni kabaian nanou.
I kaurea wiu nako iai, I barua am tua. K
Alleluia, alleluia
Butimaea te rongorongo aei, ae tiaki aia taeka aomata, ma bon ana taeka te Atua. Alleluia.
Euangkerio
Warekan ana Euangkerio Mataio…18:1-5, 10, 12-14
A kawara Iesu ana reirei, ao a titirakinna ni kangai: “Antai ae ko taku ba e kakanato riki n te Abanuea ae karawa?” E wetea temanna te ataei ae uarereke, ao E kateia i mataia, ao E taku: “I tuangingkami te koaua: ngkana ka maki okiri aroia ataei, ao kam aki kona n rin n te Abanuea ae karawa. Ma ane kauarerekea n ai aron te ataei ae uarereke aei, ao boni ngaia ae kakanato riki n te Abanuea ae karawa. Ane akoa temanna te ataei ae uarereke n ai aron aei i bukin arau, ao e bon akoai.Tai kaakeaa bongan temanna ibuakoia aika uarereke aikai, ba I tuangingkami: a aki toki aia anera n nora matan Tamau are i karawa. Tera ami iango? Ngkana tao tebubua ana tibu te aomata temanna, ao akea ba e bua temanna; tiaki e na kitania akana ruangauni ma ruaman i aoni maunga, ao e na nako ni kakaea ane bua? Ao ngkana e a manga reke irouna, ao I tuangingkami ae koaua: e na bati riki kukureina irouna nakon kukureina irouia ruangauni ma ruaman aika aki bua. Arona naba: tiaki nanon Tamami are i karawa ba e na bua temanna ibuakoia aika uarereke aikai.”
Tibatiba: Kammarakeai n am Taeka te Uea ao kamaeuai