Wiki 19 Kanimabong
Warekan ana Boki te burabeti ae Etekiera.. 16: 59-63
E kangai te Uea: “Ierutarem, are ko karaoia, ao N na karaoia naba nakoim, ngkai ko riaon am taeka ma n urua te berita. Ma N na uringa te berita are I karaoia ma ngkoe n am tai n ataei, ao N na karaoa te berita ma ngkoe ae e na akea tokina. Ao ngkoe, ko na uringa arom, ao ko na mama ngkana I anaia tarim aika karimoam ma karimuim, ma n anganiko ba ai natim, ma tiaki kanoan au berita ma ngkoe, ao ko na ataai ba te Uea Ngai, ba ko aonga n uringaba ao ko aonga ni mama ma ni kainababu ngkana I kabarai am bure ni kabane.”
Te Taramo Itaia 12:2-6
Kaekana: Ko kaki unim, ao ko kabebeteai.
Bon te tia kamaiuai te Atua, I onimaki, I aki manga maku.
Bon te Uea korakorau ma au anene, Bon au tia kamaiu. K
Kam na kukurei ni itiran, Ni koburaken te maiu.
Katituaraoa te Uea, neboa arana, Kaongoia botanaomata ana makuri nako. K
Taekina kakanaton arana, Anenea te Uea ba a kamimi ana makuri,
Katanoatai i aonaba ni kabuta. Kain Tion, takarua ni kukurei
Ba E kakanato i nanom, Teuare tabu irouia Iteraera. K
Alleluia, alleluia
E maiu ao e maka ana taeka te Atua, e ninia nako te nano. Alleluia.
Euangkerio
Warekan ana Euangkerio Mataio..19: 3-12
A kawara Iesu Baritaio, ba a kani kamanea, ao a kangai nakoina: “E katauaki te aomata ba e na kanakoa buna ngkana iai bukina?” E kaekaia ni kangai: “Kam aki wareka taekan te Tia kariki bai ngke E moa ni karika te aomata, ba E karaoia ba te mane ao te aine, ao E kangai: ‘Ai ngaia ae e na kitana tamana ma tinana te aomata ba e na nim ma buna, ao a n ariki ba ti te irikona ngaia uoman.’ Ma ngaia ae tiaki uoman ngaia ba ti te irikona. Ai ngaia, ane e botia te Atua, ao ke e tai karaurea te aomata.” Ao a taku nakoina: “E aera Mote ngkanne ngke e tua ba e na anganaki te aine te beba n raure ngkana e kanakoaki?” E kaekaia Iesu ni kangai: “E kariaingkami Mote ni kanakoia bumi, I bukini matoatoan nanomi, ma tiaki arona mai moana. Ao I tuangingkami, ba ane kanakona buna, ae tiaki buna ni kewe, ba e na buna temanna, ao e wenenibure iai; ao ane buna neiere kanakoaki, ao e wenenibure naba.” A taku ana reirei nakoina; “Ngkana ai ngaia anne aron te mane ma buna, ao e a tau te aki iein.” E kaekaia Iesu ni kangai: “A aki bane aomata n ongo nanon te taeka anne, ma a ongo ti akana anganaki te ongo. Ba iai iunaki aika bon aroia ni aia makuri aomata, ao iai iunaki aika bon aroia i bon irouia i bukin te Abanuea ae karawa. Ane kona n ongo, ao ke e ongo.”
________________________________________________________
Tibatiba: E kani karaoa ana Beita n Akoi te Atua ma ngaira n aki totoki