Wiki 20 Moanibong
Warekan ana boki te burabeti ae Etekiera. 24: 15-24
E roko irou ana taeka te Uea ae kangai: “Te nati n aomata, n nang ana neiene kabaian matam mai irouia n te aro ae karina. Ma ko na aki kaota te nanokawaki, kona aki tang, e na aki tinako ranin matam. Kaina tangim, tai tanginiwenei, kabaea niran atum, kabaea am kau ni waem, tai rabuna buaim, tai kana aia bwerena aomata.” I taetae nakoia aomata n te ingabong, ao e mate kainabau n te tairiki. Ao ngke e a manga ingabong, ao I karaoa are I tuangaki. Ao a taku aomata nakoiu ngkanne: “Ko aki kona n tuangira nanon te baene ko karaoia?” Ao I kangai nakoia: “E roko irou ana taeka te Uea ae kangai: Kangai nakon te utu ae Iteraera: Aikai ana taeka te Uea. N nangi bainataea umau ae tabu, ae kamoamoani korakorami ma kabaiani matami ao mamaten nanomi. A na mate n te kabang natimi mwane ma aine ake kam kitania. Ao kam na karaoa ae I karaoia: kam na aki rabuni buaimi, kam na aki kang aia bwerena aomata, kam na kawakin niran atumi ma kauniwaemi, kam na aki tanginiwenei ao kam na aki tang. Kam aki nako ainako ibukin ami bure ao kam na aki ngurengure iroumi. Bon te kanikina ibukimi Etekiera. Kam na aki karaoa are e a tia ni karaoia. Ngkana e koro bukin aei ao kam na atai bwa te Uea ngai.
Te Taramo Tua Kaua 32:18-21
Kaekana: Uringa Atuam are karikiko.
Ko manuokina te Ba are bungiko, Ko aki uringa te Atua are karikiko.
E nora anne te Uea, ao e maraki nanona, ao E kaki taekaia natina mane ma aine. K
E kangai: “N na tannako mairouia, ao N na mataku n aroia.
Bon te roro ae buakaka, bon nati aika aki kakaonimaki. K
A katanga nanou iroun te atua ae te akea, A kaunai n aroia ae akea manena.
N na katangi nanoia iroun, ae tiaki te oi ni botanaomata,
N na kaunia iroun te botanaomata ae nanobaba. K
Alleluia, alleluia.
Butimaea ma te nanoraoi Te taeka ae unikaki i nanomi,ba e kona ni kamaiu tamneimi. Alleluia.
Euangkerio
Warekan ana Euangkerio Mataio..19:16:22
E nakoni Iesu temanna te aomata, ao e kangai nakoina: “Te Tia Reirei, tera te raoiroi ae N na karaoia ba e aonga n reke irou te maiu ae aki toki?” E taku Iesu nakoina: “Ko ti titirakinai taekan te raoiroi? Ti temanna ae raoiroi. Ma ngkana ko kan rin n te maiu, ao kawakin taian tua.” Ao e kangai teuarei: “Tua ra?” E taku Iesu: “Tai kamamate, tai wenenibure, tai ira, tai kaotioti ni kewe, karinea tamam ma tinam, tangira raom n ai arom ngkai ko tangiriko.” Ao e kangai te rorobuaka nakoina: “I kawakini baikanne ni kabana: ao tera riki ae riai irou?” E taku Iesu nakoina: “Ngkana ko kan raoiroi n te aro ae kororaoi, ao nako, kaboi nako am bai, n angania akana kainnano, ao e na reke am kaubai i karawa; ao ko a nakomai ni irirai.” Ngke e ongo anne te rorobuaka, ao e nako ma te nanokawaki, ba e bati ni kaubai.
________________________________________________________________________________
Tibatiba: Ngkana ko kani kamaiuaki ao nako kabonakoi am bai n angania akana kainnano
Tariu ao maneu te oi ni bai ae ti riai ni kabanea ara tai iai bon kakaean ao karekean te bai ae ti tuangaki n ana taeka te Atua nakoira n te bong aio. Ao tera te bai anne? Eng te oi ni bai ae moan te kakawaki bon te bai are taekinaki n te ewangkerio n te bong aio are e titiraki iai te rorobuaka nakon Iesu; ba bon te Maiu ae aki toki, ke akea tokina. Ke te maiu are aki kona ni bua ma e a bon tiku naba iroura ngkai ao n aki totoki. Ti ataia n te karaki ba te rorobuaka aio bon te kaubai ao tao e tabe ni warenako ana iango ba tera ae na riki ngkana e a mate. A na tiku kaubaina akekei irouna ke a na bane ni bua. E moan kaeka Iesu ni kangai kawakina te Tua ao baina te maiu ae raoiroi. Ao imuin are tuanga Iesu ba e bon kawakina te Tua ao e a manga tuanga Iesu ba e riai ni kabonakoi ana bai nako ao n angania kainnano. Ti tuangaki n te ewangkerio ba tera te bai ae riki iroun te rorobuaka aio. E rawawata nanona ba e rawa n anganako kaubaina ba e bae nanona iai. E koaua ba te bai ae na kamaiura bon tiaki kaubain te maiu aio ma bon te maiu n Atua are E anganira Iesu. Ngkana ti kaubai ao e na bon kanganga rokora n te Abanuea ae Karawa ngkai e bon wariki te kawai ao te mataroa ao ti na bon ribaba ao n nako kona n rin n te keiti (gate) ma uotara aika bati mani bubura.
Ti na uringa Atuara are karikira ao ti katotonga ao ni karaoa Nanona ae tuangira ba ti aonga ni kamaiuaki n aki totoki. Ti na kabonakoi kaubaira ao ti na angania kainnano.