Wiki 20 Kauabong
Warekan ana Boki te burabeti ae Etekiera. 28: 1-10
E roko irou ana taeka te Uea ae kangai: “Te nati n aomata, kangai nakon uean Turo: Aikai ana taeka te Uea: Ko onrake n te kamoamoa, ao ko kangai: ‘Te atua ngai, I tekateka i aon ana kaintokanuea te Atua i nukani marawa.’ Bon te aomata ngkoe, ao tiaki te Atua, ao ko kaboraoiko ma te Atua. Akea ba ko wanawana riki nakon Taniera, akea te tia rabakau ae botau ma ngkoe! A reke am kaubai ibukini wanawanam ma am rabakau; Ko kaikoa te koora ma te tirewa i nanoni nnem am kaubai.
Ngkai e ababaki rabakaum ni iokinibai, ma n ririkirake am kaubai, Ao e rikirake naba nanom ni kamoamoa. Ma ngaia ae E kangai te Uea: Ngkai ko kaboraoiko ma te Atua, ao N na kanakomaia ianena ni kaitarako, Ba te moa n tiritiri i buakoia botanaomata. A na ua kabang ni kaitara wanawanam, a na bainatea mimitongim, A ana kabakako i nanon te rua, ao ko na mate n te tiringaki i nukani marawa. Ngkana a kamateko, ao ko na kangai naba: “Te atua ngai?” Bon te aomata ngkoe, ao itiaki te atua i nanoni bain teuare kamateko. Ko na mate n ai aroia aika aki korotobibiaki, ko na mate i nanoni baia ianena. Ba I a tia n atongnga.
Te Taramo Tua Kaua 32: 26-28, 30, 35-36
Kaekana: Au bai te maiu ao te mate.
I taku: N na ikikiia ni kamantintiia, ao N na kabuai uringaia mai aon te aba,
ma e kawa ni kamoamoa iai aiaia. Ke a tai kairua iai aia kairiribai. K
Ke a tai kangai: “E toka ara kai ba ti korakora, ao tiaki ana makuri te Uea aei.”
Bon te botanaomata ae aki noraba, ae akea te wanawana irouna. K
E na kanga temanna ni kakioia tenga? Ke uoman ni kamakuia tebuina tenga?
Boni bukina ba E kaboia nako Teuare aia Ba, Ao E kabureia te Uea. K
Ba e kan aia tai ni kabuanibai, e na waetata ni katiaki aroia.
Ba E na kaeta taekan ana botanaomata te Uea, E na nanoangaia ana aomata. K
Alleluia, alleluia.
E teimatoa n aki toki ana taeka te Uea; Bon te Rongorongo ae Raoiroi ae kam anganaki. Alleluia.
Euangkerio
Warekan ana Euangkerio Mataio…19: 23-30
E kangai Iesu nakoia ana reirei: “I tuangingkami ae koaua: e na kanganga iroun te kaubai te rin n te Abanuea ae karawa. I boni manga tuangingkami: e bebete riki rinin te kamero ni bangabangan te neiran nakon rinin te kaubai n te Abanuea ae karawa.” Ngke e ongo anne reirei ao a bati ni kuba, ao a taku: “Ai antai ae kona ni kamaiuaki?” E tarataraia Iesu, ao E taku nakoia: “A aki kona anne aomata, ma E konai bai ni kabane te Atua.”
E taetae ngkanne Betero, ao e taku nakoina.”
“Noria, ti a tia ni kitani bai ni kabane ao ti a iriko; tera tibangara iai?” E taku Iesu nakoia: “I tuangingkami ae koaua, ngkami aika kam irai: n tain te maiu ae bou, ngkana E tekateka Natin te aomata n ana kaintokanuea ae mimitong, ao kam na tekateka naba i aoni kaintokanuea aika tebui ma uoua, ni motiki taekaia barongani Iteraera aika tengauni ma uabaronga. Ao te aomata nako ae kitana ana auti, tarina, manena, tamana, tinana, natina ke abana, i bukin arau ao e na anganaki boona ae tebubua te tai maitina, ao e na baina te maiu ae aki toki. A maiti tan rimoa aika na rimui, ao tan rimui aika na rimoa.
__________________________________________________
Tibatiba: Ai antai ae kona ni kamaiuaki?
Tariu ao maneu n reitaki ma te rongorongo are ti tuangaki ngkoananoa ba e aki kona n rin te kaubai n te Abanuea ae Karawa, ti a manga tuangaki n te bong aio ba tera ae na riki nakoira ngkana ti kamoamoa nakon te Atua ibukin korakorara aika ti karekei mani kaubain te maiu aio ke te aonnaba aio. Tariu ao maneu ti kauringaki ba ngkana ti kamaoamoa ibukin korakorara aika a reke man kaubaira ao a na bon manga reke bain aonteaba aikai ba urubekeara ao kamateara n te aro are e na teretere ni koaua ba bon tiaki ngaira atua ma bon ngaira ana karikibai te Atua aika a mena taekan arora ni kabane iroun te Atua are E karikira. Te bai riki teuana ae moan te kananokawaki ae na riki nakoira ba man arora ni kamoamoa nakon te Atua ao ti na karekea nakoira te kabuanibai ae akea n aiarona are bon te mate ae akea tokina inanon te ai i moone.
Tariu ao maneu tera am koaua n te titiraki ba “Ai Antai ae kona ni kamaiuaki te Uea?” Eng, kaekan te titiraki aio e bon mena iroura n aron ara onimaki ba a mena arora ni kabane iroun te Atua ngkai boni Ngaia ae tautaeka n te Maiu ao te Mate. Are nanona ngkanne ba ngkana ti katikui arora ni kabane inanon bain te Atua ao ti irira Nanona inanon maiura ao ti na bon kamaiuaki. Ti na onimakina ana nanoanga ma ana tangira te Atua ibukira ba boni Ngaia ae te tia kawakinira ao E na buokira inanon taian kanganga ni kabane aika ti kaitarai inanon maiura aio. Ti bon aki kona ni karekea te kamaiuaki bon ti iroura ke n ti ngaira ma bon ti ma te Uea ao Irouna ae ti kona ni kamaiuaki iai.