Wiki 20 Katenibong
Warekan ana Boki te Burabeti ae Etekiera. 34: 1-11
E roko irou ana taeka te Uea ae kangai:
Te nati n aomata, taetae ni burabeti nakoia tani kawakinia Iteraera, taetae ni burabeti nakoia ni kangai: Tani kawakintibu, aikai ana taeka te Uea: A na maraia tani kawakinia Iteraera, ngkai a kaamarakeia boni ngaia. Tiaki a riai ni kaamarakea aia nanai tani kawakintibu? Kam kanuaingkami n te rannimamma, kam kunnikaingkami n te burae n tibu, ao kam anga ami tibu aika moan te marika ba ami karea, ma kam aki kaamarakea te nanai. Kam aki kamarurungia tibu aika mamara, kam aki kuakua ane aoraki, kam aki bauta ane ikoaki, kam aki kaoka ane tibanako, kam aki kakaea ane bua. Ma kam kairiia ma te unun ao te matoatoa. A mae nako, ba akea te tia kawakinia, ao a riki ba konaia man ni kakang ni bane, ao a mae nako. E tiotio nako au nanai riaon te aba. Akea temanna ae tabe iai, ao akea temanna ae kakaea. Tani kawakintibu, ongora n ana taeka te Uea. Ngai ae I maiu, - bon ana taeka n tuea: ngkai e kamaeaki au nanai ma n riki ba kanaia man ni kakang ni bane, baa kea te tia kawakinna; ngkai a aki tararua au nanai au tia kawakintibu; ngkai a kaamarakeia boni ngaia au tia kawakintibu n aki kaamarakea te nanai, ao ongora n ana taeka te Uea, ngkami tani kawakintibu. E kangai te Uea: N nangi bon kaekaia tani kawakintibu. N na ana au nanai mairouia, ao a nangi bon kaekaia tani kawakintibu. Ngkanne a na aki kaamarakeia i bon irouia tani kawakinitibu. N na buritiia au tibu mai nanoni wia, ao a na aki manga riki ba kanaia. Ba E kangai te Uea: Boni Ngai ae N na tararua au nanai, ao N na toua.
Te Taramo 23
Kaekana: E kawakinai te Uea, akea kainnanou.
Bon au tia kawakintibu te Uea, akea kainnanou.
E kaweneai n te uteute ae maiureirei; E kamotirawaai i rarikin te ran,
E kaoka maiun nanou iai. K
E kairai n te kawai ae raoiroi, I bukin arana.
Ngkana I toua te marua ae ro, Ao I aki maka te kabuanibai:
Ba raoi ngkoe, ao iai ekom ma am kai, E rau nanou iai. K
Ko katauraoa au taibora, I mataia tan ribaai,
Ko kabira atuu n te ba, E taonako au mangko. K
Bon iriau tea koi ma te tangira, Ni katoa bongini maiuu;
Mwengau bon uman te Uea, n au bongi nako. K
Alleluia, alleluia.
Ane kawakina ana taeka Kristo, ao e na kororaoi tangiran te Atua irouna. Alleluia.
Euangkerio
Warekan ana Euangkerio Mataio… 20: 1-16
E kangai Iesu nakoia ana reirei: “Te Abanuea ae karawa, ai aroni nataniwin te utu temanna, ae otinako n te moaningabong ba e na karekeia tani makuri i bukini nnen ana kainikurebe. E baireia ma ana tia makuri ba tatabeua te tenario boia n te bongina; ao e kanakoia nakoni nnen ana kainikurebe. E manga otinako tao n te aoa ruaiua, ao e noriia tabeman ba a teitei n aoriia i nanon te marae, ao e taku nakoia: “Nako naba, ngkami, nakoni nnen au kainikurebe, ao N na anganingkami bomi ae riai.” Ao a nako. E manga otinako naba n te aoa tebui ma uoua, ao manga n te aoa tenua, ao ai arona naba arei. Ngke e manga otinako n te aoa nimaua, ao e manga noriia tabeman ba a teitei, ao e taku nakoia: “Kam aera ngkai kam a tiku ikai n aki makuri ni kabongnga?” A taku nakoina: “Akea ae kamakurira.” A taku nakoina: “Akea ae kamakurira.” E kangai nakoia: ‘Nako naba, ngkami, nakoni nnen au kainikurebe.” Ngke e a tairiki, ao e taku mataniwin te nne ni kurebe nakon ana tabonibai: ‘Weteia tani makuri, ao angania booia, ni moa mairouia ake a tiba roko ni karokoia ake a moa n roko.’ Ao a roko moa uake a kamakuraki n te aoa nimaua, ao a anganaki tatabeua te tanario. Ngke a roko uake a moa ni kamakuraki, ao a taku i nanoia ba e na raka booia, ma a anganaki naba tatabeua te tenario. Ngke a anganaki boia, ao a ngurengure nakoni mataniwi te utu ni kangai: ‘A tiba roko uakai, ao ti teuana aia aoa ni makuri, ao ko kaboraoia ma ngaira, aika ti uota rawawatan te ngaina ma te kabuebue!” E taku nakon temanna i buakoia: ‘Raou, I aki babakanikawai nakoim: tiaki ti a tia ni boraoi i aon teuana te tenario? Nako ma am bai. Ngkana nanou te angan teuae tiba roko te bo ae I anganiko, ao tiaki I taua aron au bai? Ke tao e tangi nanom ngkai I tituaraoi?’ Ai arona anne: a na rimoa tan rimui, ao a na rimui tan rimoa.”
_____________________________________________________________________
Tibatiba: Ti weteaki iroun te Atua ba ti na makuri n ana oo ni kainikurebe
N te moani wareboki n te bong aio ao ti ongora aron unin te Atua itouia tan kawakin tibu ibukia Iteraera ake a aki karaoi raoi tabeia n tarauaia ao ni kamarakeia aia tiibu ao n noria ba a na aki reke n te kabuanibai. Bon nakoan naba te tia kawakintibu ba e na buokia akana a kabuanibai ni bauti ikoakia ao n tebokia ba aonga ni maiuraoi. Ma ibukin aki karaoan tabeia tan kawakinia Iteraera ao e taunga te burabeti ae Etekiera ba e na tatae ni burabeti ao e na angania ana taeka ni kamaraia ba a na reke kaia ibukin aki karaoan tabeia. Ao irarikina ao a na maraia ibukin aroia ni babakanikawai nakoia te botanaomata ni karekei aroia man uan aia makuri ao maonoia te botanaomata.
Ba tera raoi oin tabeia tani kawakin tibu ae a riai ni karaoia ibukia aia nanai n tibu? Eng bon te bai ae rangi ni kakakwaki ba a noria ba a na maiuraoi tibu. Ke a na taraia ba e na reke irouia tiibu te maiu ae aki totoki.
N te ewangkerio ao e taekinna Mataio ba karekean te maiu ae akea tokina bon te roko n te Abanuea ae Karawa inanon te kabaia, te kimareirei ao te mimitong ae kororaoi.
N te ewangkerio ao te kamaiuaki aio e na reke iroura ngkana ti ongo ao ti kaeka ana wewete te Atua ba ti na makuri n ana oo ni kainikurebe ba ti aonga ni karekea boora n tokin tet tai ke kaniwangara are bon te maiu ae akea tokina.
Bon taben ngkanne te tia kawakintibu ba e na buokia ana tibu ba a makuri n ana oo n ana kainikurebe te Uea inanon kakaraoan Nanon te Atua n ara makuri n tangira ao ni ibuobuoki nakoia raora ao n aki karaoan te bure. Ma ngkana ti aki kairia aomata nakon te karaoan te raoiroi ao Nanon te Atua ao ti na bon bukintaeka ibukia. Ngaira ake ti riki ba tan kawakintibu inanon nakoara ni kairiri, bon iai muikoara ae kakawaki ba ti riai ni buokia tarira ma amnera ake a kananoanga ba a raroanako ma ana tangira ma ana nanoanga te Atua ao a nang mate tamneia ibukin te bure. Bon baera ba ti na kauringia ao ni manga kaokia nakon te Uea. Ngkana ti aki karaoa tabera aio ao ti na bon karekea nakoira te aro ni kamaraiaki ae taekinaki nakoia tan kawakin tibu n te moan wareboki n te bong aio. A na bon motikaki taekara nakon te mate ae aki totoki.