Wiki 20 Kaabong
Warekan ana Boki te Burabeti ae Etekiera 36: 23-28
E roko irou ana taeka te Uea ae kangai: N na kaota tabun arau ae kakanato, ae kam bainataeia i buakoia botanaomata, ba kam bainataeia i buakoia. Ao a na ataai botanaomata ba te Uea Ngai, ba N na kaota arou n tabu i mataia, i bukimi. Ao N na anaingkami mai buakoia botanaomata nako, N na botingkami man aba nako ianena, ao N na kaokingkami nakon abami. N na kabaroa te ran ae itiaki i aomi, ao kam na tebokaki. N na kaitiakingkami mani barekami nako ma ami bouananti nako. N na anganingkami te nano ae bou, N na karina iroumi te tamnei ae bou. N na kanakoa mairoumi te nano ae te atibu, ao N na anganingkami te nano ae marau, N na karina tamneiu i nanomi: ao kam na kakaonimaki iai. Kam na maekana te aba are I kaburea nakoia ami bakatibu. Kam n ariki ba au botanaomata, ao N n ariki Ngai ba Atuami.
Te Taramo 51:12-15, 18-19
Kaekana: N na tebokingkami n te ran ae itiaki.
Atuau, karika nanou ae itiaki, Karina irou te iango ae matoa,
tai kararoaai ma matam, tai ana maiirou tamneim ae raoiroi K
Kaoka nakoiu kabaiau ni kamaiuaki, Kamatoa irou te nanomaka;
N na reireia tani bure am kawai, ao a na okiriko akana buakaka. K
Ko aki kukurei n te angakarea, Ko rawa n te karea ni kabuokaki.
Au karea ngai, te nano ae uruaki, Ko aki rawa nakon te nano ae uruaki, ae raraoma. K
Alleluia, alleluia.
Taetae, te Uea, ba e ongora am toro: A mena iroum taekan te maiu ae aki toki. Alleluia.
Euangkerio
Warekan ana Euangkerio Mataio..22: 1-14
E kangai Iesu nakoia mataniwia berebitero ma unimanen aonteaba: “Te Abanuea ae karawa, ai aron te botaki ni mare are e karaoia temanna te uea i bukin natina te mane. E kanakoia ana tabonibai ba a na weteia tani kaoaki. Ma a rawa n roko. E manga kanakoia ana tabonibai riki tabeman ma te taeka ae kangai: ‘Tuangia ake a kaoaki ba e tauraoi te amarake: a tiringaki au kao ma au man aika marikarika; nakomai nakon te amarake.’ Ma a aki muti iai, ao a nako, temanna nakon ana bobai, temanna nakon ana ribana, ao ake nikiraia, a tauia ana tabonibai te uea ni kamateia. E a un te uea, ao e kanakoia ana tia buaka ni kamateia tan tiritiri akekei ma ni kabuoka aia kawa. Ao e manga kangai nakoia ana tabonibai: ‘E tauraoi te amarake ni mare, ma e aki tau aroia ake a kaoaki. Ma ngaia ae kam na nako tutani kawai, ao weteia nako akana kam bo ma ngaia.’ Ao a nako tabonibai akekei n tou kawai nako, ao a botiia ake a bo ma ngaia, aikai raoiroi ma aika buakaka. Ao e kebo te auti irouia tan roko. Ao e rin naba te uea ba e na noriia tan amarake, ao e nora temanna te aomata ba e aki kunnikaia n te kunnikai ni mare, Ao e taku nakoina: ‘Raou, ko kanga n rin ikai n akea am kunnikai ni mare?’ Ao ngaia e aki ngongo. E taku te uea nakoia ana tabonibai: ‘Kabaei baina ma waena, ao tewenakoa n te ro are i ao i buakon te tang ma te kangenge wi.’ Ba a maiti akana weteaki, ma a karako akana rineaki.”
___________________________________________________
Tibatiba: Ana kakao te Uea nakoira ba ti na bane ni kamaiuaki
Tariu ao maneu ko a ataia ae E rangi tangiriko te Uea ao E bane nanona iroum ba ko rangi ni kakawaki Irouna? Eng ngkana ko tuai man ataia ao ko a manga kauringaki n te bong aio aron Nanon te Uea ibukim ao ibukin n aron ana kakao nakoira ba ti na kawara ana baka n amarake ibukin ana mare Natina.Aio bon aron te Atua nakoira ni katoa bong ba ti na kaea ana baka n marake i Karawa. Ngkai E babane nanona iroura n tai nako ao E tangira ba ti na roko ni maeka i rarikina i Karawa ba ti aonga ni katonga ana baka n amarake ni kukurei. Ma e koaua ba iai baika a kakawaki ba ti na karaoi ba ti aonga ni kona n roko n ana baka n amarake.
Te moani bai bon te kona n ongo ana kakao nakoira ao ni kaeka. Ti riai n aki nanououa n ana kantaninga te Uea ae moan te kakannato ibukira ba ti na kabaia ao ni kukurei ma Ngaia n aki totoki. Ti na kainaomataira mani baai aika a na katabetabeira ba ti na aki ongo ana wewete te Atua. Te kauoua ni bai ae kakawaki bon te tauraoi ni biti maiura ba ti na maiuna te raoiroi ao te itiaki n aron ana kanataninga te Atua. N te taramo n te bong aio ao ti kauringaki iroun te Uea ba “E na tebokira n te ran ae itiaki”. Eng, ngkana ti nakon te Uea ao ni maeka ma Ngaia ao ti na bon onikaki ba E na tebokira ao n anganira te nano ae bou ae maraurau ao E na karikira ba aomata aika bou iroun Tamneia ae Raoiroi. Te kateniua ni bai ae kakawaki ba a riai n reke baira ke ara kunikai aika tau ibukin kaean ana baka n amarake te Uea ba ngkana ti aki katoka iaora te kunikai ae tangiraki ao ti na bon kaotinakoaki ao ti na tewenakoaki n te ai ni moone ike e boo iai te tang ao te kangenge wi.
Tariu ao maneu teiraki ao katauraoiko n te bong ao kaeka ana kakao te Atua nakon ana botaki n maarake ngkai E rangi n tangiriko ao E babane Nanona iroum. Katoka oneam ae mainaina ao tauraoi n rin inanon te botaki ae mimitong i Karawa.