Wiki 20 Kanimabong
Warekan ana Boki te burabeti ae Etekiera.. 37: 1-4
E toka bain te Uea i aou, ao E kairai tamnein te Uea, ao E katukai i nukan te marua teuana ae oni n taian ri. E kairai ri buakoia ni itera nako, Moan te maiti taian ri i aon tanon te marua, ao a mauteretere. E taku nakoiu: “Te nati n aomata, a na maiu taian ri aikai?” Ao I kangai: “Te Uea, ko bon ataia, Ngkoe.” Ao E taku nakoiu: “Taetae ni burabeti i aon ri aikai ni kangai: Ri aika kam mauteretere, ongora n ana taeka te Uea. E kangai ana taeka te Uea nakon ri aikai: Ae N nang karina tamnei inanomi, ao kam na maiu. N na katiki ia i aomi, N na karika te iriko i aomi, N na takina te kun i aomi, ao N na anganingkami te tamnei, ao kam na maiu, ao kam na ataai ba te Uea Ngai.” Ao I taetae ni burabeti n ai aron are I tuangaki. Ao Ngke I taetae ni burabeti, ao iai te karongoa ma te ruru, ao a kaitibo ri, teiana ma raona; I tarai, ao a tiki ia, ao a riki irikoia, ao e aroraki te kun i aoia, ma akea te tamnei i nanoia. Ao E taku te Uea nakoiu: “Taetae ni burabeti nakon te tamnei, taetae ni burabeti, te nati n aomata. Kangai nakon te tamnei: Nakomai, te tamnei, man anga aika aua, ukiia mate aikai, ba a aonga ni maiu.” Ao I taetae ni burabeti n ai aron are I tuangaki, ao e rin te tamnei i nanoia, ao a manga maiu, ao a teirake i aoni waeia: bon te koraki ae ababaki ae uanao.
Ao E kangai te Uea nakoiu: “Te nati n aomata, ri aikai, bon te utu ae Iteraera ni kabanea, ao a kangai: ‘A mauteretere rira, a bua ara kantaninga, bon akea riki arora.’ Ma ngaia ae ko na taetae ni burabeti. Kangai nakoia: Aikai ana taeka te Uea: I kauki ruami, N nang aekingkami man ruami, ngkami au botanaomata, ao N na kaokingkami nakon abani Iteraera. Ao kam na ataai ba te Uea Ngai, ngkana I kauki ruami ma n aekingkami main anon ruami, ngkami au botanaomamta. Ao N na karina au tamnei i nanomi, ao kam na maiu, ao N na kamaekaingkami i aon abami, ao kam na ataai, Ngai te Uea, ba I a tia n taetae ao I kakoroa bukina.”
Te Taramo 107:2-9
Kaekana: Katituaraoa te Uea, ba akea tokin ana tangira.
Ke a kangai uake a kamaiuaki iroun te Uea, Ake a kamaiuaki mairouia tani karawawata,
Ba E botiia mai buakoia botanaomata, mai mainiku ma maeao, meang ma maiaki. K
A tiotio nako n te rereua ae mate, n aki reke kawain te kawa ae maekanaki.
A baki ma ni kanimoi, a ainako tamneia i nanoia. K
A wetea te Uea n rawawataia, ao E kamaiuia mani kainanoia,
E kairiia n te kawai ae eti, nakon te kawa ae a na maeka iai. K
Ke a neboa te Uea n ana tangira, n ana makuri aika kamimi i bukia aomata.
Ba E kamooa te tamnei ae taka, ao E katoka nanon ane baki. K
Alleluia, alleluia
Te Uea, e kamaiua nanou am taeka, e kaotai matau am reirei. Alleluia.
Euangkerio
Warekan ana Euangkerio Mataio..22: 34-40
E titirakina Iesu temanna i buakoia Baritaio ni kangai: “Tera te tua ae kakanato riki i buakon tua?” E kaeka Iesu ni kangai: “Ko na tangira te Uea ae Atuam ma nanom ni kabanea, ma tamneim ni kabanea, ma am iango ni kabanea. Titebo naba kakanaton te kauoua n tua ae kangai: Ko na tangira raom n ai aron tangiram i bon iroum. E bane te Tua ma burabeti i nanon tua akana uoua akanne.”
Tibatiba: Katituaraoa te Uea, ba akea tokin ana tangira