Wiki 21 Moanibong
Warekan ana moa n Reta Bauro nakoia I Tetaronike. 1: 1-5, 11-12
Bauro, Tiriwano ao Timoteo nakon te Ekaretia are I Tetaronike, are i nanon te Atua ae Tamara ao i nanon ara Uea ae Iesu Kristo. Te akoaki ma te raoi nakoimi mairoun te Atua te Tama ao mairoun te Uea ae Iesu Kristo.
Ti bae ni katituaraoia te Atua n tai nako i bukimi, tari; ao e bon riai anne ngkai e bati n rikirake ami onimaki, ao e rikirake naba te itangitangiri iroumi ni bane. Ma ngaia ae ti kamoamoaira n aromi i matan nako ana Ekaretia te Atua, i bukin nanomakami ma ami onimaki i buakon te bainikirinaki ma te rawawata ae kam taonaki iai. E oti iai etin maraki i bukina. Ti aki toki n tataro i bukimi, ba E aonga ni buokingkami te Atua ma makana ni kakoroi bukin nanomi ni kani karaoa ae raoiroi, ao bukin ana makuri te onimaki iroumi. E na neboaki iai aran ara Uea ae Iesu Kristo.
Te Taramo Tua Kaua 96: 1-5
Kaekana: Kaongoia botanaomata ana makuri aika kamimi.
Anenea te Uea n te Kuna ae bou, Anenea te Uea aonaba ni bane?
Anenea te Uea, neboa arana. K
Taekina ana kamaiu ni katoa bong, Kaota mimitongina i buakoia botanaomata,
ma ana kamimi n aba nako. K
E kakanato te Uea, e riai neboana. E kakamaku i aoia atua nako;
Bon te akea atuaia botanaomata. K
Alleluia, alleluia.
Te Uea, reireiai kawaiu, kairai n te kawai ae eti. Alleluia.
Euangkerio
Warekan ana Euangkerio Mataio…23:13-22
E taetae Iesu nakoia aomata ao nakoia ana reirei ni kangai: “Kam na maraia, ngkami tani koroboki ma Baritaio, aika tani kewea te aba ba kam kaina te Abanuea ae karawa nakoia aomata! Kam bon aki rin ngkami ao kam tukiia akana kan rin! Kam na maraia, ngkami tani koroboki ma Baritaio aika tani kewea te aba! Kam kabuta marawa ma aonaba ba kam na raira nanon temanna te aomata, ao ngkana e a reke, ao kam karaoia ba kaini Kenna, ae uoua te tai buakakana riki nakoimi. Kam na maraia, ngkami tani kairiri aika kam mataki, aika kam kangai: ‘Ane taetae n tuea n Temboro, ao akea baena; ma ane tuea ni kooran te Temboro, ao e bae iai.’ Te koraki ni baba ma ni mataki! Tera ae kakanato riki, te koora ke te Temboro ae katabua te Koora? Kam kangai naba: ‘Ane tuea n te baonikarea, ao akea baena; ma ane tuea n te karea ane i aona, ao e bae iai.’ Te Koraki ni mataki! Tera ae kakanato riki, te karea ke te baonikarea, ae katabua te karea? Ane tuea n te baonikarea, ao e tuea n te baonikarea ao ni baika i aona ni kabana. Ane tuea n te Temboro, ao e tuea n te Temboro ao iroun Teuare maeka iai; ane tuea ni karawa, ao e tuea n ana kaintokanuea te Atua ao iroun Teuare tekateka i aona.
_______________________________________________
Tibatiba: Reita nako kabutan te Rongorongo ae Raoiroi
Tariu ao maneu, ti kauringaki nte taramo nte bong aio bati riai ni kakaongoia te botanaomata Ana kamimi te Atua tiaki ti ibukin kamoamoakin te Atua ma bon ibukin kamaiuara. Ba ti na bane ni kamaiuki ngkana ti kakoaua Iesu ba boni Ngaia Natin te Atua ao ti na riai n tatakaruaea ana kamaiu nakoia te botanaomata. Bon Nanon te Atua ba a na bane ni kamaiuaki aomata nako ngkana a karika Iesu ba aia Uea ma Atuaoa ao ngkana a kaburei maiuia ba a na kakaraoa Nanona n tai nako. E bon riai ngkannne ba ti na aki toki ni kakaota Iesu n arora n taetae ao n ara makuri n te aro are ti na reke ba rabatan te rongorongo ae raoiroi nakoia aomata. Ti riai ni maiu inanon te koaua n te aro are e na titebo te bai ae ti taekinna ma te bai ae ti karaoia. Ngkana ti aki karaoa aio ao nanona ngkanne ba ti bon maiu inanon te kewe n ai aroia te koraki ake a kamaraiaki iroun Iesu te ewangkerio n te bong aio. Ngkana ti aki kaota Iesu ni maiura ao nanona ngkanne ba ti bon kaota teuare buakaka inanon maiura. Are nanona ngkanne ba ti kaota bannan te riaboro nakoia aomata ao tiaki Iesu. Ngkana ti karaoa aio ao ngkanne ba ti bon kairia aomata nakon te bure ao te mate ao ngkanne ti na bon bukintaeka irouia ibukin kairakia nakon te mate. Tariu ao maneu ti na butia te Atua ba E na kawakinira man te kabuakakaki ao te kamaraiaki are ti ongo taekana n te ewangkerio n te bong aio. Ke buokira te Atua ba ti na riki ba taan kakaota te rongorongo ae raoiroi ao tan kairia aomata nakon te kamaiuaki ae akea tokina. Ao ibukin aio ti na ti na bon karekea naba ngaira kaniwangara ae moan te kakannato ae te rin n te Abanuea ae Karawa.