Wiki 21 Kauabong
Warekan ana moa n Reta Bauro nakoia I Tetaronike.. 2: 1-3, 14-17
Ti bubutingkami, tari, i bukin taekan rokon ara Uea ae Iesu Kristo, ngkana e nakomai ni botira i rarikina. Tai kuri ni kakiriwei nanomi, ao tai tabeianga n taian taetae ni burabeti ma karaki ke reta, aika aongkoa mairoura, aika kam na riki n taku iai ba e nangi roko naba ana bong te Uea. Ke e tai mamanai ngkami temanna n te bai teuana. E weteingkami te Atua n ara Euangkerio, ba e aonga n reke iroumi mimitongin ara Uea ae Iesu Kristo. Ma ngaia ae teimatoa, tari, tau taian reirei aika ti anganingkami n ara taeka ke ara reta. Ke E kabebetei nanomi ara Uea ae Iesu Kristo ao te Atua ae Tamara, are tangirira ma n anganira, n am akoi, te rau n nano n aki toki ma te kantaninga ae raoiroi; ao ke E kamatoai nanomi n te makuri ma te taeka nako ae raoiroi.
Te Taramo 96: 10-13
Kaekana: E nakomai te Uea ni motika taekan aonaba.
Kangai nakoia botanaomata; E tautaeka te Uea, E kateimatoa aonaba ba e na aki ing.
E na motiki taekaia botanaomata n te eti. K
Ke e kabaia karawa, ke e kimareirei aonaba, Ke e rurunga marawa ma kanoana,
Ke e kukurei te aba ma bain aona, Ke e takarua ni kukurei arokani buakonikai
I matan te Uea, ba E nakomai, E nakomai ni motika taekan aonaba. K
E na motika taekan aonaba n te eti, ao taekaia botanaomata n te koaua.. K
Alleluia, alleluia.
Ngkana ko ongo banana n te bong aei, ao tai kamatoai nanomi. Alleluia.
Euangkerio
Warekan ana Euangkerio Mataio…23: 23-26
E kangai Iesu: “Kam na maraia, ngkami tani koroboki ma Baritaio aika tani kewea te aba! Kam anga kabuian ami bai (aika uarereke, n ai aron te minte, te aneto ao te kumin, ao kam kaki kanoan te tua aika moan te kakawaki, aika te eti, te nanoanga ao te nanoraoi: a riai ni kawakinaki moa baikai, n aki kakiaki akekei. Tani kairiri aika kam mataki! Kam tabe n raumea te maninnara, ao kam onga te kamero! Kam na maraia, ngkami tani koroboki ma Baritaio aika tani kewea te aba! Kam kaitiaka tinanikun te mangko ma te raurau, ao a on nanoia n te babakanikawai ma te buakaka! Te Baritaio ae Ko mataki, Kaitiaka moa anon te mangko ma te raurau, ba a aonga ni itiaki tinanikuia naba.”
_____________________________________________________________________
Tibatiba: Ngkana ko ongo banana n te bong aei, ao tai kamatoai nanomi
Tariu ao maneu ti kauringaki n te taramo n te bong aio ba ti riai ni kamaraui nanora n tai nako riki ngkana ti ongo banana te Atua n te bong aio. Ba tera banana te Uea ae kan tuangira n te bong aio? Eng, n taai nako ao e weteira Iesu nakon te rairannano ba ti na tan nakoina ao ni butia ba E na kabarai ara bure ao E na nanoangaira ba ti kananoanga. E bon riai iroura ba ti na butia te Atua te wanawana n ataia ba e kakawaki te tauraoi n tai nako ngkai ti bon aki ata kanoan te ingabong riki ngkana E anai maiura te Atua n aron ana bababire. Ba te wanawana ni koaua bon kabanean korakora ni maiura aio ni kaikoi bain te maiu ae na roko ao n aki kataua ba bain te aonnaba aio ae mamauna e na kabua mairoura reken te maiu ae akea tokina.
Ba ngkana a toki maiura n te aonnaba aio ao a na motikaki taekara man muin ara kekeiaki inanon maiura. Eng bon arora ni maiu n te tai aio ae a na motikaki iai taekara nakon te kabaia ae akea tokina i Karawa ke nakon te mate ao te kabuakakaki ae akea tokina i moone.
Tariu ao maneu tin a kauki ao ni kamaraui nanora n ongo ana wewete te Atua nakon te rairannano n te bong aio ao ti na teirake naba n te bong aio n okira te Atua ao ni butia ba E na kabarai ara bure. Ti na aki kamatoai nanora ngkana ti ongo banana ba ti aonga n tauraoi ngkana a roko weteara ni kaeka ma te ingainga ao n tairaoi n rin i Ierutarem ae Bou are a na bon akea iai te tang ma te te maraki ao a na akea naba iai roon te bong ba ai bon te ota n tai nako ngkai bon raora te Tibu te Tei ae Iesu Kristo ae te Tia kamaiua aonnaba.