Wiki 21 Kaabong
Warekan ana moa n Reta Bauro nakoia I Korinto. 1: 1-9
Ngai Bauro, ae I weteaki iroun te Atua ba ana Abotoro Iesu Kristo, ao Totetene ae tarira: nakon ana Ekaretia are I Korinto, nakoia akana tia ni karaoiroaki i nanoni Kristo Iesu, aika weteaki ba ana aomata te Atua, i buakoia ni kabaneia akana manewea aran ara Uea ae Iesu Kristo ae aia uea ma ngaira. Te akoaki ma te raoi nakoimi mairoun te Atua ae Tamara ao mairoun te Uea ae Iesu Kristo.
I aki toki ni katituaraoa te Atua i bukin ana akoi ni bane nakoimi i nanoni Kristo Iesu. Kam anganaki, i nanona, te kaubai ni kabane, ae kaubain te reirei ma te ataibai. Ba e a teimatoa iroumi kakoauani Kristo. Ao bon akea te karea n tamnei ae kam na kainnano iai, ba kam kariaria kaotin ara Uea ae Iesu Kristo. E na kateimatoaingkami n ua te toki, ao e na akea bukinami n ana bong ara Uea ae Iesu Kristo.
Ba E kakaonimaki te Atua, are weteingkami ba kam na botaki ma Natina ae ara Uea ae Iesu Kristo.
Te Taramo 145: 2-7
Kaekana: N na neboa aram, te Uea, n aki toki.
N na karaoiroiko ni katoa bong, N na neboa aram n aki toki.
E kakanato te Uea, e riai neboana, Akea baireani kakanatona. K
E na kamoamoai am makuri te roro nakon te roro, a na taekin am makuri kamimi,
a na karakina raneaneani mimitongim, a na katanoatai am makuri aika kakanato. K
A na taekin am makuri aika kakamaku, a na kaota taekani kakanatom,
A na kauringa am akoi ae ababaki.E na kamoamoaki am raoiroi. K
Alleluia, alleluia.
Kaurei matau, te Uea, ao N na nori kamimi, Aika muin am tua. Alleluia.
Euangkerio
Warekan ana Euangkerio Mataio…24: 42-51
E kangai Iesu nakoia ana reirei: “Tantani, ba kam aki ata te bong ae E na roko iai ami Uea. Kam na ataia: Ngke arona ba e ata ana tai te tia ira n roko mataniwin te auti, ao e na tantani ao e na aki kariaia ba e na ewaraki on ana auti. Ai aromi naba, ngkami: kam na tauraoi, ba E na roko natin te aomata n te tai ae ka maki iangoia.
Ba antai te tabonibai ae kakaonimaki ma ni iangoraoi are e kateia te toka ba mataniwia kain ana auti, ae na angania kanaia n te tai ae riai? E kabaia te tabonibai anne ngkana e noria ana toka n rokona ba e tabe n ana makuri. I tuangingkami te koaua: e na kateia ba mataniwin ana bai ni kabana. Ma ngkana e buakaka te tabonibai anne ma ni kangai I nanona: E baenikai au toka n roko’ ao ngkana e oroia raona ma e amarake ma ni moi ma tani manging, ao e na roko ana toka te tabonibai anne n te bong ae e aki kataningaia iai ao n te tai ae e aki ataia; e na kanakoa, ao e na karekea tibangana ae tibangaia tani kewea te aba i buakon te tang ma te kangenge wi.”
_________________________________________________
Tibatiba: N na neboa aram, te Uea, n aki toki
Tariu am maneu ti bon riai ni karekea te kibu are I rineia n te bong aio ba ara korati are ti na aneneneia ni katoa bong. Eng, bon aio te tataro ae moan te kakawaki are ti riai ni bainna inanon maiura n tai nako ae botau ma ana kantaninga te Atua. Ba aron naba aio ae e a tia ni kaotaki ba tamnein ao kabarabaran te Abanuea ae Karawa ba n te Kawa arei ao akea riki te bai ae karaoaki ba bon ti neneboan ao taromaurian te Atua. E bon reitaki naba aio inanon te tataro ae te korona are bon taekan te moromoro teuana are tomai moromoro ake kaka tebuina inanon moromoro te korona are nimabui. Te tataro are anaaki n te moromoron aio are tomai moromoro ake kaka tebuina bon te tataro are “E na neboaki te Tama, te Nati ao te Tamnei ae Raoiroi”. Are nanona ngkanne ba ti reireinaki n te korona ba inanon iteran maiura aika kakakokoro ake a kaotaki man te miterio ni kimareirei, ota, maraki ao mimitong ba ti na riai n teimatoa n neboa te Uea n ara tataro are “E na neaboki te Tama…”
Ma ko a tia ni karaua ni iangoia ba e aera ngkai ti riai n neboa te Atua n tai nako? Eng, boni ibukina ba e bon onrake n te raoiroi ao e kororaoi n te tamaroa re Atua ngkai bon aio Anuan ao kabarabaran te Atua. Ti bon riai naba n neboa te Atua ibukin ana makuri aika kamimi ao ana nanoanga ma ana tangira ae kororaoi ao e aki kona ni bibitaki nakoira ngaira ana botan aoamata ao ana karikibai.
Ao tera arora n neboa te Atua ae ti riai ni karaoia? Eng tariu ao maneu i bon irou ngai ao I taku ba bon Nanon te Atua ba ti riai n neboia tiaki ti n tataro ma ara taromauri, ma ae kakawaki riki bon ara makuri aika raraoi ake a na kaota ana tangira ao ana nanoanga nakoia aomata. Eng ti riai n neboa te Atua ni karaoan makuri n tangira nakoia kainnano ma ake a taonaki n te rawawata ma te kananonga. Ao te bai ae kakawaki riki bon karaoan aio n tai nako.