Wiki 21 Kanimabong
Warekan ana moa n Reta Bauro nakoia I Korinto. 1: 17-25
E aki kanakoai Kristo ba N na babetito, ma E kanakoai ba N na kaotiota te Euangkerio, n aki baina te wanawana n taetae, ba e kawa ni bua uan ana kaibangaki Kristo. Ba te iango ni baba taekan te kaibangaki irouia akana tabe ni bua, ma boni makan te Atua irouia akana tabe ni kamaiuaki. Ba e koreaki ae kangai: “N na kamaunai wanawanaia akana wanawana, N na kabuai rabakauia akana rabakau.” Enga ngkai ane wanawana? Enga te aomata ae rabakau? Enga te tia iango i aon te aba aei? Tiaki bon te nanobaba wanawanan aonteaba iroun te Atua? A aki kina te Atua aomata ni wanawana aonteaba. Ma ngaia ae boni wanawanan te Atua ba E kani kamaiuia tan onimaki n te iango n nanobaba ae ti tataekinna. A bubuti kanikina I Iutaia, a ukera te wanawana I Erene, ao ngaira ti kaotiota Kristo ae tauraki n te kaibangaki, ae te bai ni kabakabaka irouia I Iutaia ao te nanobaba irouia bekan; ma boni Kristo ae makan te Atua ao wanawanan te Atua irouia akana weteaki, aika I Iutaia ma I Erene. Ba e wanawana riki nanobaban te Atua nakon te wanawana n aomata, ao e korakora riki mamaran te Atua nakoni korakoran te aomata.
Te Taramo 33:1-2, 4-5, 10-11
Kaekana: E on aonaba n ana akoi te Uea.
Kukurei nakon te Uea, ngkami aika kam raoiroi, e kakan neboana irouia akana a eti nanoia.
Katituaraoa te Uea ma te abi, Katanga te raea ae tangaun karaina. K
E koaua ana taeka te Uea, a eti ana makuri nako.
E tataninga te eti ma te raoiroi, e on aonaba n ana akoi. K
E urua aia babaire aomata te Uea, E tuki aia iango botanaomata.
Ma e teimatoa ana babaire te Uea, ao motin nanona n roro nako. K
Alleluia, alleluia
Reireiai am kawai ma am tua, ao N na iaongoi am makuri aika kamimi. Alleluia.
Euangkerio
Warekan ana Euangkerio Mataio. 25:1-13
E taetae ni kaikonaki Iesu nakoia ana reirei ni kangai: “Aei aroni kabotauan te Abanuea ae karawa: A uoti aia taura ataeinaine ake tengaun ba a na nako ni butimaea te tia iein. A nanobaba niman, ao a wanawana ake niman. A anai aia taura nake a nanobaba, ma akea aia ba. A ua ba nake a wanawana i nanon aia atiniba ma aia taura. Ngke e a iremwe n roko te tia iein, ao a bane ni kataoi mataia ni matu. Ngke e a nukanibong, ao e takarua te aba ni kangai: ‘Ae e a roko te tia iein! Otinako ni butimaia.’ Ao a bane n uti ataeinaine akekei, ao a katauraoi aia taura. A taku nake a nanobaba nakoia nake a wanawana: ‘Anganira teutana n am ba, ba a kani mate ara taura.’ Ma a kaekaia nake a wanawana ni kangai: ‘E na aki tau maitina I bukira ao I bukimi, e raoiroi ngkana kam nakoia tani bobai ni kaboa ami ba.’ Ao ngke a nako, ao e roko naba te tia iein, ao a rin ma ngaia n te ru n amarake nake a tauaroi, ao e a kainaki te mataroa. Rimui a roko naba nake raoia, ao a kangai: ‘Te uea, te uea, kauka te mataroa nakoira.’ Ma e kaekaia ni kangai: I tuangingkami te koaua: I aki kinaingkami.’ Ma ngaia ae kam na tantani, ba kam aki ata te bong ma te aoa.”
______________________________________________________
Tibatiba: A on Karawa ma Aonnaba ni Mimitongin te Atua
Kam uringa te tai ke te tabo are a taekinaki iai taeka aikai inanon te baibara ao n ana tai ni maiu Iesu? Ao tera te bai ae ringaki iai nanom ngkai ko ongo taeka aikai? Tariu ao maneu aikai taeka aika a rangi n riringa nanou ba bon taeka ake a takaruai Iutaia nakon Iesu ngke e rin i Ierutarem ni kamoamoa iai Iesu ao ni kaotia ba boni Ngaia te Uea ae kanakomaiaki iroun te Atua ba E na kamauia aonnaba.Bon taeka akai ake a taekinaki n tain toan te Banni are e butimaeaki iai Iesu inanon rinna i Ierutarem. Bon aikai taeka ake angan aonnaba te kantaninga ibukin ana kamaiu te Atua are a karuoa nakon aonnaba iroun Natina ae Iesu Kristo ae te Metia ao Tia Kamaiu. Bon aio taeka ake a kamatoa ao ni kakoaua ba Iesu bon Natin te Atua are moan te maka man mimitong are ruo ni maeka i buakora. Ti riai n aki nanououa ngkanne n ana tangira te Atua ibukira ao ana kantaninga te Atua ba ti na kona ni katonga Karawa ikai iaon te aba ma aio e na reke iroura ngkana ti maiu ni katotonga Iesu iaon te aba ni maiuakina te raoiroi inanon te koaua ke ti riki ba Natin te Atua ni maiura iaon te aba. Ngkana ti karaoa Nanon te Atua ao ti riki ni koaua iai ba bannan ao katotongan te Atua are nanona ngkanne ba ti bon uota ao ni kaotanako naba mimitongin te Atua nakon tabo ake ti kawari ngke ti maeka iai.
Tariu ao maneu ti na kauki nanora nakon ana wewete te Atua ba ti na kona ngkai naba ni katonga Karawa ikai iaon te aba. Ti na rairi nanora ao ni manga oki nakon Iesu ao n tauraoi n kakeaira, n tabeki ara kaibangaki ao n irira Iesu ni katoa bong. Ti na kariki ara bong ni kabane ba ara tai n neneboa ao n taromauria te Atua n raonia anera ma kain karawa ao Nei Maria n anenea te kuna ae kangai; “E tabu, E tabu E tabu te Uea ae Tabaota. A oni Karawa ma aonnaba ni mimitongoa Hosanna i etani Karawa!!!”