Wiki 22 Kanimabong
Warekan ana moa n Reta Bauro nakoia I Korinto. 4: 1-5
Ti bia atongaki irouia aomata ba ana tia makuri Kristo ma tan tibatibai ana miterio te Atua. Ao te kantaninga irouia tan tibatiba ba a na noraki ni kakaonimaki. I aki kuba ngai ni motikan taekau iroumi ke n aia bowi aomata; ao I aki motika taekau naba i boni irou. Bon akea naba te bai ae I namakinna ba I bure iai; ma I aki karaoiroaki n anne: te tia motika taekau, bon te Uea. Ma ngaia ae kam na tai iranikuri ni motikitaeka; ma kantaninga rokon te Uea. Boni Ngaia te tia kaotai baika raba n te ro, ao E na kaoti iango aika raba n te nano; ao e na anganaki te aomata nako oini karaoiroana iroun te Atua.
Te Taramo 37:3-6, 27-28, 39-40
Kaekana: A maiu akana raoiroi iroun te Uea.
Onimakina te Uea, karaoa ae raoiroi, maekana te aba, maiu ma te rau,
Ukera Kukurein nanom iroun te Uea, ao E na anganiko ane e tangiria nanom. K
Muiokoa arom iroun te Uea, Onimakinna, ao E na baira Ngaia;
E na kaota am raoiroi ai aron te ngaina, ao am eti n ai aron te tawanou. K
Kaki te buakaka, karaoa ae raoiroi, ao e na teimatoa mwengam;
ba E tangira te eti te Uea, E aki kikitania raona. K
Boni mairoun te Uea maiuia akana raoiroi, boni Ngaia katanaia n te rawawata;
E buokiia te Uea, ao E kamaiuia, ba a katania irouna.K
Alleluia, alleluia
I onimakina te Uea, I kakoaua ana taeka. Alleluia.
Euangkerio
Warekan ana Euangkerio Ruka…5:33-39
A kangai Baritaio ma tani koroboki nakoni Iesu: “A bati n aki mamatam ma n tataro ana reirei Ioane, ao ai aroia naba aia reirei Baritaio; ao a amamarake ma ni momoi am reirei!” E kaekaia Iesu ni kangai: “Kam tangiriia raon te tia iein ba a na aki mamatam ngkana e mena I buakoia te tia iein? E na roko taina: ngkana e uotaki nako te tia iein mairouia, ao ngkanne a ana aki mamatam.”
E taetae ni kaikonaki naba nakoia ni kangai: “Akea ae raea te moti man te kunnikai ae bou ba e na itua n te kunnikai ae mane, ba e raeaki iai te kunnikai ae mane. Akea naba ae atoa te uain ae menai i nanoni batoro aika mane, ba a tabwenaua batoro n te uain ae menai, ao e baro te uain ao a bua batoro aika bou. Ao akea ae tangira te uain ae menai ngkana e a tia ni moi n te uain ni ikawai. Ba e kangai te taeka: “Ae raoiroi bon te uain ni ikawai.”
____________________________________________________________
Tibatiba: Te kakaonimaki n tiabatiba miterion ana tangira te Atua
Tariu ao maneu tera muiokoara ae kakawaki iroun Iesu inanon maiura aio? Terana ae kantaningaia te Uea mairoura ba ti aonga n aki morikaki taekara iai ma a na reke kaniwangara ae bon te maiu ae akea tokina?
N te bong aio ao e tangi maka banaan St Bauro n te moani warebonki ni kauringira ba ti riai kakaonimaki nakon muiokoara ae E a tia anganira te Uea ao are boni ngaia ae a na motikaki iai taekara. Ba ti riai ni kakaonimaki n tibatiba miterion ana tangira te Uea ba ti aonga ni bane ni kamiuaki. Eng e boni kantanigaira te Uea ba ti riai moa ni kartina ao ni butimaea ana tangira te Uea n te aro are a na kairaki iai maiura ke ti na maiuakinna ni katoa bong. Ma te bai ae kakawaki riki ba ti na riai n tibatibaia te tangira anne nakoia tarira ma manera. Ti na uringa are ti bon aki kona n tiba ana tangira ngkana e aki ura moa inanora ain ana tangira te Uea. Ngaia are kakoroan nanon muikoara iroun Iesu e bon kainnanoa moa ae ti kaura ain ana tangira te Uea i nanora ao imuina ti na kakaonimaki n tibatiba te tangira anne nakoia aomata nako. Ao te kakaonaimaki e bon kainnanoa are ti na kakaraoia ni katoa bong.
N ai aron St Bauro ao ti riai ni kaburei mauira ao ni katabuira ibukin karaoan Nanon Iesu. Ao ngkana ti kakaonimaki ni karaoa aio ao a na bon akea te bai ae ti na raraoma iai ba a na aki motikitaekara ma ti na anganaki kaniwangara iroun Iesu are bon te maiu ae akea tokina irarikna ao ma Ngaia i Karawa.