Wiki 24 Katenibong
Warekan ana moa n Reta Bauro nakoia I Korinto. 12: 31, 13:13
Kam na nanoni karea aika moan te rine. Ao N nang kaota nakoimi te aro ae rine riki nakoni karea ni kabane. Ngke arona ba I taetae n aia taetae aomata ma anera, ma akea te tangira irou, ao ai aron te burati ae tangitang ngai ma te timbara ae rebwerebwe. Ngke arona ba I anganaki te kona n taetae ni burabeti, ao ngke I atai taian rabakau, ao ngke iai irou te onimaki ae kororaoi, ba te onimaki ae mwemweki maunga, ma akea te tangira irou, ao bon te akea ngai. Ngke arona ba I tibatibai au bai nako ba bain tangira, ao ngke I anga rabatau ba e na kabuokaki, ma akea te tangira irou, ao bon akea uani baikanne irou. E taotaonnano te tangira, e akoi, e aki bakantang, e aki kamoamoa, e aki kainikatonga, e aki ribuaka, e aki ukera oin arona, e aki kakaiun, e aki nanobuaka n te rawawata, e aki kukurei n te babakanikawai, ma e kukurei n te koaua. E bebete nanona ni bai ni kabane, e kakoauai bai ni kabane, e onimakini bai ni kabane, ao e nanoraoi ni bai ni kabane. E aki mauna te tangira; a na mauna taetae ni burabeti, a na toki taian taetae, a na bua taian rabakau. A aki kororaoi ara rabakau, ao aki koraoi ara taete ni burabeti, ma ngkana e roko te kororaoi, ao e na mauna te aki kororaoi. Ngke te ataei ngai, ao bon arou te taetae n ataei, ao te iango n ataei, ao te eti n ataei. Ma ngke I a ikawai, ao I kaki aroia ataei. Ti noraba ngkai, kanga n te tirotam,ba a bubuteiakaka matara; ao rimui ti na nori bai ni kaitarai. I atatai ngkai n te aro ae aki kororaoi, ao rimui N na atatai n ai arou ngkai I ataai. A teimatoa baika tenua, ba te kakoaua, te onimaki ao te tangira, ma e kakanato riki i buaoia, bon te tangira.
Te Taramo 32(33): 2 – 5, 12, 22
Kaekana: E kabaia ana botanaomata te Uea.
Katituaraoa te Uea ma te abi, Katanga te raea ae tengauni karaina.
Aneneia n te kuna ae bou, kabanei rabakaumi ni katangitang. K
Ba e koaua ana taeka te Uea, a eti ana makuri nako.
E tatangira te eti ma te raoiroi, e on aonaba n ana akoi. K
E kabaia te botanaomata ae Atuana te Uea ao te aba ae E rineia ba ana bai.
Te Uea, ke e mena i aora am akoi, ba ti kantaninga iroum. K
Alleluia, alleluia.
Ngkana iai ae tangirai, ao e na tau au taeka, ao E na tangiria Tamau, ao ti na roko irouna. Alleluia.
Euangkerio
Warekan ana Euangkerio Mareko…7: 31-35
E kangai Iesu nakoia aomata: “N na kabotauia kain te roro aei ma antai? A katotongia antai? Ai aroia ataei aika tekateka ni maraen te kawa, aika ikaekaeka i bon irouia ni kangai:
Ti katangitangi i bukimi, ae ka maki ruoia!
Ti anene n tanginiwenei, ao kam aki tang!
Ba e roko Ioane te tia Babetito, ae aki kangi bwerena ma ni moi uain, ao kam taku: ‘Iai te taimonio irouna!’ E roko Natin te aomata ae amamarake ma ni momoi, ao kam taku: ‘Bon te buabeka ma te tia manging, ao raoia bubirikano ma tani bure.’ Ma e karaoiroaki te wanawana irouia natina ni bane.”
Tibatiba: Te karea ae te kabanea n rine