Wiki 24 Kaabong
Warekan ana moa n Reta Bauro nakoia I Korinto..15: 1 – 11
Tariu, I a kauringa nakoimi te Euangkerio are I a tia n taekinna ngkoa. Kam a tia ni butimaia, ao kam tiku naba i nanona. Boni ngai ae na kamaiu ngkami, ngkana kam kawakinna n ai aron are I taekinna nakoimi. Ao ngkama kam aki, ao e matebuaka ami onimaki. Are I moa n taekinna nakoimi, bon te baere taekinaki naba nakoiu. Ba E mate Kristo i bukin ara bure, n ai aron taekana n taiani koroboki. E taunaki ao E mangauti i muin tenibong, n ai aron naba taekana n taiani koroboki. E kaoti nakoni Keba, ao nakoia naba uake tengauni ma temanna, ao i muina nakoia tari ake nimabubua tabun n ti te taina (a mate temangina, ma a maiti naba aika maiu ngkai). E kaoti naba nakoni Iakobo, ao nakoia Abotoro ni kabaneia. Ao n tokina, E kaoti naba nakoiu, ngai ae te kabanea n aomata. Ba moan te mangori ngai i buakoia Abotoro, ao I aki riai n atongaki ba te Abotoro, kioina ngke I a tia ni bainikirina ana Ekaretia te Atua. Ma arou ngkai, bon uan ana aoi t eAtua, ao e aki matebuaka ana akoi i nanou. Ma e bati riki au makuri nakoia ni kabaneia; tiaki au makuri, ma bon ana makuri ana akoi te Atua irou. Bon anne ae ti taekinna, ngaia ke ngai, ao bon anne naba ae kam kakoaua.
Te Taramo 117 (118): 1 – 2, 15 – 17, 28
Kaekana: Katituaraoa te Uea ba E akoi.
Katituaraoa te Uea ba E akoi, akea tokin ana tangira.
Ke e kangai Iteraera: akea tokin ana tangira. K
E tokankai bain te Uea, E korakora bain te Uea.
N na aki mate, ma N na maiu, ao N na taekin ana makuri te Uea. K
Atuau Ngkoe, I katituaraoiko, Atuau, I kamoamoako.
I katituaraoiko, ba Ko ongo irou, ao Ko kamaiuai. K
Alleluia, alleluia.
I arani ngkami ba raou, ba I kaongoi ngkami, ana taeka ni bane te Tama nakoiu. Alleluia.
Euangkerio
Warekan ana Euangkerio Ruka..7: 36-50
E kaoa Iesu temanna te Baritaio ba E na amarake ma ngaia. Ao E roko irouna, ao E kaea nnena n amarake. Ao e kaoti ainen te kawa temanna ae buakaka. E ongo neierei ba E mena Iesu n ana auti te Baritaio, ao e uota ana batoro ma kanoana te kabira ae boiarara. Ao e tei n tang i bukini waena, ao e teboki waena n rannimatana, ao e kaoi ni iranatuna; ao e kaboria ma waena, ao e kabiri n te boiarara. Ngke e nora anne te Baritaio are kaoa, ao e taku i nanona: “Ngke arona ba te burabeti te aomata aei, ao e na bon ata te aine ae kuakuaia aei ma arona ae buakaka. Ma E taetae Iesu, ao E kangai: “Timon, iai te bae I kan tuangko.” E taku teuarei: “Te tia Reirei, taekinna.” Ao E kangai Iesu: “Temanna te aomata. A bae irouna uoman aomata, ba temanna nimabubua te tenario, baena, ao are temanna nimabui. Ma akea kabarani baeia irouia; ao e a kaki naba baeia teuarei. Antai irouia akana uoman akanne, ae na tangira riki teuarei?” E kangai Timon: “I taku ngai ba teuare e bati riki baena ae kamaunaki.” E taku Iesu: “E eti am iango.” Ao E rairaki ngkanne nakon te aine arei, ao E taku nakon Timon: “Ko nora neiei? I rin n am auti, ao ko aki teboki waeu, ao neiei, e teboki waeu n rannimatana, ao e kaoi ni iranatuna. Ko aki kaboria ma Ngai, ao neiei, e kaboria ma waeu mangke I moa n ri ni karokoa ngkai. Ko aki kabira atuu, ao neiei, e kabiri waeu n te boiarara. Ma ngaia ae I bon tuangko: a maiti ana bure, ma a kabaraki, kioina ngkai e bati ana tangira. Ma e karako ana tangira te aomata ae e uarereke baena ae kabaraki.” Ao E taku nakon te aine arei: “A kabaraki am bure.” Ao a taku kain te amarake i nanoia: “Antai te aomata aei, ngkai e kabarai bure?” E taku Iesu nakon te aine: “E kamaiuko am onimaki. Nako ma te rau.”
Tibatiba: A kabaraki am bure; E kamaiuko am onimaki”