Wiki 24 Kanimabong
Warekan ana moa n Reta Bauro nakoia I Korinto.. 15: 12 – 20
Ngkai E tataekinaki Kristo ba E mangauti mai buakoia mate, ao a kanga n taku temaninga i buakomi ba akea mangautia mate? Ngkana akea mangautia mate, ao E aki mangauti Kristo. Ma ngkana E aki mangauti Kristo, ao e matebuaka ara kaotioti, ao e matebuaka naba ami onimaki. Ao bon tani kaotioti ni kewe ngaira ngkanne, ngkai ti kakoaua te Atua ba E kauta Kristo, ao ngaia E aki kautia ngkana e koaua ba a aki mangauti mate. Ba ngkana a aki mangauti mate, ao E aki mangauti naba Kristo. Ao ngkana E aki mangauti Kristo, ao e matebuaka ami onimaki, ao kam bon tiku naba i nanon ami bure. Ao a bua naba ngkanne akana mate i nanoni Kristo. Ngkana ti onimakina Kristo ti i bukin te maiu aei, ao moan te kananoanga ngaira i buakoia aomata nako. Ma tiaki ngaia anne: E boni mangauti Kristo ba te moa n ua i buakoia akana matu.
Te Taramo 16 (17): 1, 6 – 8, 15
Kaekana: N na miakiniko, te Uea, ngkana I a uti.
Te Uea, ongo te tang ae eti, kakauongo au wewete.
Anga taningam nakon au tataro, ba akea te kewe i nanoni wiu. K
I weteiko, te Atua, ba Ko na kaekaai; anga taningam, ongora n au taeka.
Kaota am akoi ae kamimi. Ngkoe ae kawakinia, akana katania i ani baim. K
Karabaaai n nuni baim. Kaniwangan au raoiroi, ngai,
N na katoka nanou, n tara matam ngkana I a uti. K
Alleluia, alleluia.
Am taeka, te Uea, bon te koaua; katabuira i nanon te koaua. Alleluia.
Euangkerio..
Warekan ana Euangkerio Ruka..8: 1-3
E nakonako Iesu ri nanoni kawa ma tabo ni maeka, n reirei ma ni kaota rongorongon Uean te Atua. Bon raona uake tengauni ma uoman, ao aine tabeman ake a kamaiuaki mairouia tamnei aika kamara ao man aorakia, ba Maria ae aranaki ba Matarena are a otinako mairouna taimonio ake itiman, ao Ioana ae buni Kuta, ao Tutana, ao tabeman riki ake a buokia n aia bai.
__________________________________________________________________
Tibatiba: E boni mangauti Kristo ba te moa n ua i buakoia akana matu