Wiki 25 Moanibong: Feast of Sto Mataio te Abotoro
Warekan ana Reta Bauro nakoia I Ebeto… 4: 1 – 7, 11 – 13
Ngai, ae I kabaeaki i nanon te Uea, I butingkami ba kam na kaboraoi aromi ma weteami ae kam weteaki iai: baina te nanorinano, te nimamanei? te taonannano; keiaki ni kawakina te bonnano ae muini weteami are kam weteaki iai. Ti temanna te Uea, ti teuana te onimaki, ti teuana te babetito; ao ti temanna te Atua ae Tamaia aoamata ni bane, ae i aoia ni kabaneia, irouia ao i nanoia ni kabaneia. Ti anganaki, n tatabemanira, tibangara n ana akoi te Atua, n ai aron ana katautau Kristo n ana karea. E kateia temangina ba Abotoro, ao temangina ba burabeti, ao temangina tani kaotiota te Euangkerio, ao temangina riki ba tani kawakintibu ma tan reirei. Ba E bairei aroia kiritian i bukini makurin nakoaia, ba a na katea rabatani Kristo. Ao ti bane ni uaiakina katiana, ae te riki n ti teuana n te onimaki ao n atakin Natin te Atua. Ba ti na karikirakea te Aomata ae e na koro raoi ikawaina, ao e na kororaoi irouna tabanini Kristo.
Te Taramo 18 (19): 2 – 5
Kaekana: E buta aonaba n aia taeka.
E katanoata mimitongin te Atua karawa, e kaota muni baina tinanikuni karawa.
E karakinna te ngaina nakon te ngaina, e kaota taekana te bong nakon te bong. K
Tiaki te taeka, ao tiaki te taetae, ao akea te bana ae oti,
ma a roko banaia i tabon aonaba, ao a roko aia taeka n tian aon te aba. K
Alleluia, alleluia.
Ti neboiko, te Atua, ti kakoauako ba te Uea; a kamoamoako am koraki n Abotoro aika mimitong. Alleluia.
Euangkerio
Warekan ana Euangkerio Mataio. 9: 9-13
Ngke E tabe n nakonako Iesu, ao e nora temanna te aomata ba e tekateka n te tabo n angabai, ao arana Mataio. E taku nakoina: “Ko na irai.” Ao e teirake naba ni iria. Ngke E tabe n amarake Iesu n ana auti teuanne, ao a roko bubirikano ma tani bure ake a maiti ba a na amarake ma Iesu ma ana reirei. Ngke a nora anne Baritaio, ao a kangai nakoia ana reirei: “E aera ami tia Reirei, ngkai E amarake ma bubirikano ao tani bure?” E ongo Iesu ao E taku: “A aki kainnano iroun te tia katoki aoraki aomata aika marurung, ma bon akana aoraki. Ma ngaia ae kam na nako, ao reireingkami nanon te taeka ae kangai:
“ I tangira te nanoanga, ao tiaki te angakarea. Ba I roko ni weteia tani bure,
ao tiaki akana raoiroi.”
_____________________________________________________________________
Tibatiba: I roko ni weteia tani bure, ao tiaki akana raoiroi.