Wiki 29 Kanimabong
Warekan ana Reta Bauro nakoia I Ebeto..4: 1 – 16
Ngai, ae I kabaeaki i nanon te Uea, I butingkami ba kam na kaboraoi aromi ma weteami ae kam weteaki iai: baina te nanorinano, te nimamannei, te taonannano; keiaki ni kawakina te bonnano ae mairoun te Tamnei, n te raoi ae botingkami. Bon ti teuana te rabata, ao ti temanna te Tamnei, ba bon ti teuana naba te kantaninga i muini weteami are kam weteaki iai. Ti temanna te Uea, ti teuana te onimaki, ti teuana te babetito; ao ti temanna te Atua ae Tamaia aomata ni bane, ae i aoia ni kabaneia, irouia ao i nanoia ni kabaneia.
Te Taramo 23(24): 1 – 6
Kaekana: Te Uea, tai karaba matam.
Ana bai te Uea aonaba ma kanoana, ao aon te aba ma kaina nako.
E kateia Ngaia i aoni marawa, E katoroa i etani karanga. K.
Antai ae na ararakea ana maunga te Uea? Antai ae na tei n ana tabo ae tabu?
Ane a aki bure baina, ae e itiaki nanona, ane aki ri ni baika akea maneia. K.
E na reke kabaiana mairoun te Uea, ao kaniwangana mairoun te Atua
ae ana tia kamaiu. Bon anne aroia akana ukeria,
akana ukera matan Atuani Iakoba. K
Alleluia, alleluia.
Tiaki ti te bwerena maiun te aomata, ma bon ana taeka nako te Uea. Alleluia.
Euangkerio
Warekan ana Euangkerio Ruka…12: 54 – 59
E taku Iesu nakoia aomata: “Ngkana kam nora te nang ba e waerake n tanimaeao, ao kam taku ba e na baka te karau, ao e boni koaua. Ngkana e wai te ang mai maiaki, ao kam taku ba e na kabuebue, ao e boni koaua. Tani kewea te aba, kam rabakau taran aon te aba ma karawa, ao e aera ngkai kam babanga taran te tai aei?
E aera ngkai kam aki bairea ae eti i bon iroumi? Ngkana ko mananga ma am kairiribai nakon te tia moti, ao kataia bairea arom ma ngaia i nanon te kawai, ba e kawa ni kabureko nakon te tia moti, ao e kawa ni kabureko te tia moti nakon te bureitiman, ao e kawa ni kariniko te bureitiman n te uma ni kaikain. I bon tuangko: ko na aki otinako mai iai ni karokoa barani baem ni kabanea.”
Tibatiba: Kawakina te bonnano ae mairoun te Tamnei ae Raoiroi