Wiki 4 n Avenete Moanibong
Warekan te Boki ae te Anene. 2: 8 – 14
I ongo teuare I tatangiria. Noria, e nakomai, E ewewe riaoni maunga, e kibakiba riaon tabuki. Ai aron te anterobe teuare I tatangiria, ai aron te ria te tei.
Noria, e a tei i akun ara o. E kaninganinga n te kamama, e taratara n te warawara.
E taetae teuare I tatangiria, e kangai nakoiu: “Teirake, ngkoe au tangira, ngkoe te tamaroa, nakomai. Noria, e a toki tain te kamariri, e a moti ma ni mauna te karau. A raure uen abara, e a roko tain te anene; e oti banan te turukon i abara. E katei ua te biku, e kia boiararan te kainikurebe. Nakomai, ngkoe au tangira, ngkoe te tamaroa, nakomai. Au taobe ae ko raba n tabwenan te aba, n rabeni maunga, kaota matam ao kaongongo banam, ba e kamaiu banam, ao e kakateke matam.”
E kona n oneaki muin te Wareboki anne n te Wareboki aei:
Warekan ana Boki te burabeti ae Tebania:L 3: 14 – 18
Neie natin Tion, takarua ni kukurei, Iteraera, takaka ni kimareirei! Natini Ierutarem, kabanea nanom ni kakatonga n tokanikai! E kamauna rekeni kaim te Uea, E kaoka nako aiam. Te Uea i nanom bon aia Uea Iteraera, tai manga maka te kabuanibai.
N tebong anne, ao e na kangai te taeka nakoni Ierutarem: Tion, tai maku, ke a tai mate baim. E mena i nanom te Uea ae Atuam ae te tia tokanikai ma te tia kamaiu.
Te Taramo 33:2 – 3, 11 – 12, 20 – 21
Kaekana: Anenea te Uea n te kuna ae bou.
Katituaraoa te Uea ma te abi, Katanga te raea ae tengauni karaina.
Aneneia n te kuna ae bou, Rungarungaia n ami katangitang. K.
E teimatoa n aki toki ana baire te Uea, Ao motin nanona n roro nako.
E kabaia te botanaomata ae Atuana te Uea, ma te aba ae E rineia ba ana bai. K.
A kantaninga te Uea tamneira, Boni Ngaia buokara ma otangara;
Boni Ngaia kukurein nanora, Ti onimakina arana ae tabu. K.
Alleluia, alleluia.
Nakomai, te Karangaina, Raneanean te ota ae akea tokina, taai ae te eti, Kaotaia akana tekateka n te ro ao n te mate. Alleluia.
Euangkerio
Warekan ana Euangkerio Ruka. 1: 39 – 45
E mananga Maria, ao e kawaekoa nakon te aba ae maungaunga, nakoni kawani Iuta teuana. Ao e rin n ana auti Takaria, ao e kamaura Eritabea. Ngke e a tiba ongo ana kamauri Maria Eritabea, ao e kakamakuri te tei i nanoni birotona. Ao e kaonaki Eritabeta n te Tamnei ae Raoiroi, ao e takarua ni kangai: “Ko karaoiroaki i buakoia aine, ao e karaoiroaki uani birotom. E kanga naba n reke irou Kawarau iroun Tinan au Uea? Ba noria, ngke e a tiba rota taningau am kamauri, ao e kakatei natiu ni kimareirei i nanou. E kabaia neie onimaki, ba e na koro bukin te taeka are e tuangaki mairoun te Uea.”
Tibatiba: Nakomai, ngkoe au tangira, ngkoe te tamaroa, nakomai
Tariu ao maneu bon aio te Uea ae e wewete nakoira inanon totokin wikin te Avenete ngkai ao e ang roko te Kiritimati ae ti nang butimaea iai Iesu ae nang bungiaki nakoira. Aio bon banan te Uea nakoira ba ti Nakoina Ngaia are tatangirira ao are mate nanona iroura. Ti a tia ni waki inanon te Avenete ni katauraoira nakon te tai aio are ti nang nora iai te Merimeri ae na kawarira ao are e kainanoa ara tangira ma ara akoi ngkai bon te merimeri ae uarereke ae akea te bai ae kona ni karaoia. Aio te tai are a nang ruo iai anera ni kaongoira te rongorongo ae moan te kakukurei ba e a bungiaki Iesu te Tei.
Ti na butua Nei Maria n te tai aio ba e na karekea ara tai n toba Natina ba ti na kaboroa nakoina ara tangira ma ara akoi. Ti na katauraoira ni koaua nakon te tai ae kakawaki are ti na kawara Iesu Tei Tei n ana tabo are na wene iai n te Umantabu ao ti na butia Nei Maria ba e na kariaia ba ti na toba Iesu Te Tei.
Akea ba e a roko te tai ae moan te kakukurei are ti na namakina ao ni katonga oao te kimareirei ao te kukurei ba E a roko te Toa Kamaiu nakoira iroun Natin te Atua are te tia anganira kororaoin te kamaiuaki ae akea tokina.
Ti na karokoa te rongorongo ae kakukurei aio nakoia tarira ao manera ba a aonga n reke naba tibangaia n tain te Kiritimati aio. Ba e roko Iesu tiaki ti ibukia aika marurung ma bon ibukira took ngaira aika ti kainnano mani mamara. Ti na reitaki ma Anera i Karawa n neboa te Ura n ara anene are kangai;”Ena neboaki te Atua ieta i Karawa ao te raoi i aonnaba nakoia aomata aika nanoraoi.”