Wiki 4 n Avenete Kauabong
Warekan ana moa ni Boki Tamuera. 1: 24 – 28
Ngke e a tia ni kakorira natina ae Tamuera, ao e nako Anna, ma uotana te kao mane ae tenua ana ririki ao teuana te eba ni burawa ao te batoro ni uain, ao e rin n ana Temboro te Uea i Tiro, ao bon raoia te ataei. Ao e kamateaki te kao mane, ao e kawara Eri tinan te ataei. Ao e taku: “Taiaoka, au toka; ngkai ko maiu, au toka, ao boni ngai te aine are tei i rarikim ngkoa ikai, n tataro nakon te Uea. I tataro i bukin te ataei aei, ao E ongo au bubuti te Uea. Ao ngkai, I kaburea nakon te Uea ni kabanei ana bongi ni maiu. E kabureaki nakon te Uea.”
Te Taramo 1 Tamuera 2: 1, 4 – 8
Kaekana: E kukurei nanou iroun te Uea ae au Tia Kamaiu.
E kukurei nanou iroun te Uea, e reke korakorau iroun te Atua.
I ngareakinia au kairiribai, ba I kabaia ni buokau iroum. K.
A maoto aia kainikatebe uake a maka, a niraki n te korakora uake a mamara.
A makuri i bukini kanaia, uake a nuai, a aki manga makuri, uake a baki. K.
Itiman natin neiere e kanoabo, e a mamara neiee kakariki.
Bon te Uea ae anga te maiu ma te mate,E karokoa te aomata i tiore ma ni kaokia. K.
Bon te Uea ae anga te kainano ma te kaubai, E karinanoa te aomata, ao E karietaa.
E tabeka ane mangori man te tano, E tabeka ane kainnano man te mange. K.
E katekatekaia i buakoia uea, E anganaia te kaintokanuea ae mimitong.
Ba ana bai te Uea bouan aonaba, E kaota aon te aba iai. K.
Alleluia, alleluia.
Nakomai, aia Uea botanaomata, Ae Ko botia aomata ni katiteuanaia:
Kamaiua te aomata ae Ko karikia. Alleluia.
Euangkerio
Warekan ana Euangkerio Ruka: 1: 46 – 56
E katituaraoa te Uea Nei Maria ni kangai: E neboa e Uea tamneiu; ao e kimareirei nanou iroun te Uea ae au Tia Kamaiu. Ba E mutiakina neie ana toro ae mangori; ao akea ba a na bane roro ngkai n atongai ba I a kabaia. E akoia akana makua i nanon roro ma roro. E kaota makani baina, E kamaenakoia akana iango ni kainikatonga. E kabakaia akana maka man aia kaintokanuea, ao E karietaia akana mangori. E kanuaia akana kainnano, E kaokia kaubai n akea aia bai. E kamaiua ana tabonibai ae Iteraera ba E uringa ana akoi, are akoan Aberaam ma ana kariki nako n ai aron ana teaka nakoia ara bakatibu. Ao e tiku Maria iroun Eritabeta, tao teniua namakina, ao e a okira abana.
Tibatiba: Te kareanaki nakon te Uea ba ti na maiu Ibukina
Mauri tariu ao maneu inanon te tai ae e nang totoki tauin te Avenete ba ai ti uoua riki te bong. N te bong aio n te moan wareboki ao ti ongo taekan te aine temanna are airi ma natina ao karea n angakarea ni karaba te Uea ngkai e a tia ni kaeka ana tataro ni bubuti nakon te Atua ba e na anganaki natina te maane are na kona ni kareanna nakon te Atua ba e na bainaki iroun te Uea ibukin kakaraoan Nanona. Ba tao ngkoa ngke moan bubuti ba e na anganaki natina are bon akea ngkoa ao ngkai e a bon karabaraba ba e a tia n anganako natina are e a tauraoi ni kareanna nakon te Uea.
Tariu ao maneu bon aio te bai ae ti nang noria inanon te Kiritimati ba te Atua E nang kakoroaki bukin ana berita ma te aonnaba ba e na kanakoa Natina ae te Rikitemanna ba e na ruo nako aonteaba ba e na uota te kamaiuaki nakon ana botanaomata are a tia ni baka n aia bure ara moan karo. Ai kamimira aron ana iango te Atua ibukira ba e kan manga kaokira nakoina ba ti na bane n natinaki ao n riki ba taan baibai irarikin Natina ae Iesu. E ngae ngke akea rakan arona ngkana ti kamaiuaki ma e bon tauraoi n anga Natina ba e na riki ba te karea ae kororaoi ibukin kabaran ara bure. N tain te Kiritimati aio ao ti a bon kauki nanora n nora ana karea te Atua ibukira ao n tauraoi naba ni kaeka ana tangira ao ana nanoanga ni kaburei naba maiura nakon te Atua. Ti na tauraoi ni kareani maiura nakon te Atua ba ti na riki ba ana bai ngaira aika ti tauraoi ni kakaraoa Nanona n tai nako. Ti na reitira ma tinara Nei Maria ba e na anganira nanona n tauraoi n anga naba Natina ae Iesu inanon Kiritimati ao ti na butimaia nako nanora ao ti na karikia ba ara Uea ma ara tia Kamaiu.