Wiki 4 n Avenete Katenibong
Warekan ana Boki te burabeti ae Maraki: 3: 1 – 4, 23 – 24
E kangai te Uea ae te Atua: Ae N nang kanakoa au aomata ba e na kaitiaka te kawai i maaiu. E na rin n umana ae tabu te Uea ae kam kariaria, ao e nangi roko aneran te berita ae kam tangiria. Bon ana taeka te Uea. Antai ae na kona ni maiu n ana tai n roko? Antai ae na kona n tei ngkana e a kaoti? Ba ai aron ana ai te tia kaburo kunnikai. E na tekateka n ai aron te tia kaburoburo ma te tia kaitiaki. E na kaitiakiia natin Rewi, ao E na kaburoia n ai aron te koora ma te tirewa, ao a na riki ba tani uota te karea i matan te Uea n ai aron ae riai. E na butimaeaki ngkanne ana karea Iuta ma Ierutarem, n ai arona ni bong ake ngkoa ao n ririki ake rimoa. N na kanakoa Eria nakoimi i main rokon au Bong ae kakanato ma ni kakamaku. E na rairi nanoia karo nakoia natia, ao nanoia nati nakoia aia karo, ba I kawa n roko n orea te aba n te kateke buaka.
Te Taramo 25: 4 – 5, 8 – 10, 14
Kaekana: Tararake, ba e a kaan kamaiuami.
Te Uea, tuangai am kawai, te Uea, reireiai kawaiu.
Kairai i nanon te koaua, kaotaai, boni Ngkoe te Atua ae au tia kamaiu. K.
E akoi te Uea, ao E eti: E kaota te kawai nakoia tani bure,
E kairia akana nanorinano n te eti, E reireinia kainnano ana kawai. K.
Ana kawai bon te akoi ma te koaua, i bukia akana kawakina ana berita ma ana moti.
E iraorao te Uea ma akana makua, E kaota ana berita nakoia. K.
Alleluia, alleluia.
Nakomai, Emmanuera, ae ara Uea ma ara Tia Moti: kamaiura, te Uea ae Atuara. Alleluia.
Euangkerio
Warekan ana Euangkerio Ruka. 1: 57 – 66
Ngke e koro ana tai ni bung Eritabeta, ao e bungia natina te mane. Ao a ongo raona ma kain ana utu ba E kabatia ana nanoanga te Uea nakoina, ao a raonna ni kimareirei. I muni wanibong, ao a roko i bukini korotobibian te tei. Ao kan aranna ba Takaria ba ingoan tamana. Ma e kaekaia tinana ni kangai: “Tiaki. E na aranaki ba Ioane.” Ao a kangai nakoina: “Bon akea te ara anne n am utu.” Ao a titirakina tamana ba antai te ara ae e na aranaki iai. Ao e karokoa te baba ni koroboki, ao e korea ae kangai: “Ioane arana.” Ao a bane ni mimi iai. Ao akea ba e ure wina, ao a bara newena, ao e taetae ni karaoiroa te Atua. Ao e rotiia kain te tabo arei ni bane te maku, ao e buta maungani Iutaia n taekani baikanne nikabane. Ao aomata ni bane ake a ongo, a kawakina uringana, ao a taku: “Ai tera aron te ateai ae rimui?” Ba e mena bain te Uea i aona.
Tibatiba: Tararake, ba e a kaan kamaiuami
Tariu ao maneu e a reitaki rongorongon Kiritimati n te bong iaon kororaoin te kamaiuaki ae na reke nakoira ngkana ti katauraoi raoi ni butimaea Iesu te Tei are nang bungiaki nakoira. Ba inanon ara katauraoi imain rokon Iesu ao ti riai n ongo ao ni makuria kanoan banan St Ioane te tia Babetito are e weteira nakon te babetito n rairannano ni kaeta ao ni kaboraoa kawain te Uea. Ti na teea te tabukibuki ao ti na kanoai ao ni kaboraoi taian marua are nanona ba ti riai ni karenakoi nanora ni kamoamoa ao ni kainikatonga ao ti na riai naba tauraoi ni karasoi makuri aika a raoiroi ngkana a kainanoaki. N ara katauraoi aikai ao ti na kona ni butimaea Iesu te Tei inanon te itiaki ao te kimareirei. Ma bon aio interan te katauraoi are ti weteaki nako iai inanon te avenete ma ae kakawariki riki ba ara katauraoi ni butimaea Iesu ni kaua okina ngkana e nang roko inanon te maaka ma te korakora ba E nang motika taekan aonnaba. Inanon ara katauraoi ni butimaea kaua okin Iesu ao ti riai n ongo ana wewete te Uea nakon te rairannano are ti weteaki iai irouia ana aomata te Uea ake e taetae irouia. Bon aikai aomata are a na kaitiakira ni karaneaneaira ao ni kabuekira ba aonga n nako barekarekara n ai aron te kora ma te tirewa are riai ni kabuekaki ba e aonga n nako te bareka ao n tiku te tamaroa ma te raneanea.
Tariu ao maneu bon aio te rongorongo nakoira ae kakawaki inanon te Kiritimat aio ba ti riai ni karekea kororaoin te kamaiuaki are e roko Iesu ba e na anganira n aron Nanon te Atua te Tama. Ti na bubutia te Atua te wanawana ni koaua n iangoa reken are bon te oinibai are bon te kamaiuaki ae akea tokin i Karawa ngkai ao n aki totoki.Ti riai n te tai aio n tararake ao nora te kamiuaki are E na angnira Iesu te Tei iroun Tinana ao tinara ae Nei Maria.