Wiki 4 n Avenete Kaabong
Warekan ana kauoua ni Boki Tameura: 7: 1 – 5, 8 - 11, 16
E tekateka Tawita n ana auti i Ierutarem, ba E anganna te rau te Uea, ngke E kamaunaia ana kairiribai ni bane ake a otabaninia. Ao e kangai Tawita nakon Natan: “Noria, I maeka n te auti ae te tita, ao e maeka ana ati te Atua i an umana.” E taku Natan nakoina: “Karaoi bai ni kabane aika ko iangoi, ba bon raom te Uea.”
Ma ngke e a bong, ao e roko ana taeka te Uea iroun Natan, ni kangai: “Nako, tuanga au tabonibai ae Tawita ni kangai: Aei ana taeka te Uea: Tao boni ngkoe ae ko na katea umau ae N na maeka iai? Boni Ngai are I weteiko man am nanai ngke ko rumuia tibu, ba kona kaira au botanaomata ae Iteraera. I a tia n raoniko n am makuri ni kabane, ao I taonia am kairiribai i maim. N na kakanatoa aram n ai aroia akana moa ni kakanato i aon te aba. N na karekea nnen au botanaomata ae Iteraera, ao N na unikiia iai, ao a na tekateka iai n aki manga maku; ao a na aki manga roko tani ioawa ni bainikirinia, n ai aroia ngkoa, ngke I kateia tani moti i aon au botanaomata ae Iteraera. N na kamaunaia am kairiribai ni kabaneia. E kaongoko te Uea ba E na katea am auti. E na teimatoa n aki toki am auti ma ueam i matau, e na matoa n aki toki am kaintokanuea.
Te Taramo 88: 2 – 5, 27, 29
Kaekana: N na aki toki n neboa ana Raoi te Uea
Te Uea, N na anenea am akoi n aki toki, N na kaota am koaua n roro nako.
I kangai: E tei te tangira n aki toki, Ko katea am koaua i karawa. K.
“I berita ma teuare I rineia, I tuea nakon au toro ae Tawita:
N na kawakina am kariki n aki toki, I katea am kaintokanuea i bukin roro nako.” K.
E na weteai ni kangai: “Tamau, Atuau ae au Ba ni kamaiu.”
N na kawakina tangirana n aki toki, e na teimatoa au berita ma ngaia. K.
Alleluia, alleluia.
Nakomai, Emmanuera, ae ara Uea ma ana Tia Moti: kamaiuira, te Uea ae Atuara. Alleluia.
Euangkerio
Warekan ana Euangkerio Ruka. 1: 67 – 79
Ngke e bungiaki Ioane te Tia Babetito, ao e kaonaki n te Tamnei ae Raoiroi Takaria are tamana, ao e taetae ni burabeti ni kangai:
E na karaoiroaki te Uea ae Atuaia Iteraera, ba E kawara ana botanaomata ni kamaiua; ao E kateirakea te maka ni kamaiu i nanon ana utu Tawita ae ana toro, n ai aron are E taekinna rimoa ni wia burabeti ni ikawai ake a raoroi, ba E na kamaiura mairouia aiara ao mai nanoni baia tan ribaira ni kabaneia. E kaota ana nanoanga nakoia ara bakatibu, ao E uringa naba ana berita ae raoiroi, are E taetae n tuea iai nakon Aberaam are Tamara ba E na anganira te aki maku ao te kamaiuaki mairouia aiara, ao ti na toro irouna n te raoiroi ma te eti ni kabanei ara bongi ni maiu.
Ao ngkoe, ae te ataei, ko na araki ba ana burabeti Teuare Moan te Rietata, ba ko na rimoan te Uea ni kataua kawaina, ma n angan ana botanaomata atakin te kamaiu ni kabaran ara bure.
Bon uan ana akoi ma ana nanoanga Atuara, ae na karekea Otin Taai ba e na kawarira mai ieta, ao E na kaotaia akana tekateka i nanon te ro ao n nun te mate, ba E na kairira ni kawain te raoi.
Tibatiba: Nakomai, Emmanuera, ae ara Uea ma ara Tia Kamaiu
Akea ba ti riangf roko inanon te Kiritimati are E nang bungiaki iai nakoira Iesu te Tei ae Natin te Atua ae moan te maka mani mimitong ba boni Ngaia te Atua are a karikaki bai nako Irouna ao Ibukina. Akea ba e nang roko te aoi n te karangaiana are nang kamauia aonnaba are E na uota te Raoi bnakoira ni kabane aika a raoiroi nanora. Ti na bane ni butimaea Iesu te Merimeri are nang anganira te mweraoi ao te kukurei ba e nang maeka ibuakora.
Bon aio te tai are ti nang katonga iai kororaoin te te kamaiuaki iroun Iesu are boni Ngaia ara Uea ao ara Tia Moti are e na tautaeka inanon te Koaua ma te Eti; are na kawakinira mairouia aiara ba ti aonga ni maeka inanon te raoi ao te kimareirei.
N te moan wareboki ao ti ongora aron ana babaire te Atua n rinea Tawita ba e na katea Umana ae moan te Tabu ba E aonga te Atua ni maeka ibukia ana botanaomata. Bon aio anuan te Atua are ti katonga n tai nako ngkana E maeka ibuakora ao ti butimaia ba E na maeka inanora.
Tariu ao maneu n aron are e bon aki reke ngkoa nnen Iesu are na bungiaki iai ba a bane ni kebo auti ao ngaira ti bia kauki nanora ba e na bungikai Iesu inanora n te bong aio ba ti aonga ni katonga te Rau ma te Raoi are uotia Iesu te Tei n te Kiritimati aio.