Wiki i muin te Ephiphany Kaabong
Warekan ana moa n Reta Ioane 4:19; 5:4
Ti na tangira, ba E a tia n tangirira moa te Atua. Ngkana e kangai temanna: “I tangira te Atua”, ma e riba tarina, ao bon te tia kewe. Te aomata ae aki tangira tarina are e noria, ao e aki kona n tangira te Atua ae E aki noria. Ao bon aei, te tua ae ti anganaki irouna: Ane tangira te Atua, ao ke e tangira naba tarina.
Ane kakoaua Iesu ba te Kristo, ao e rki mairoun te Atua. Ane tangira te Tama are karika te Nati, ao e tangira naba te Nati ae riki mairouna. Ti ataira ba ti tangiriia natin te Atua ngkana ti tangira te Atua ma ni karaoa are E tuangira. Ba tangiran te Atua boni kawakinan an atua, Ao aki rawawata ana tua, ba ne riki mairoun te Atua, ao e a tia ni kataea ana kai aonteaba. Ao te tokanikai ae kataea ana kai aonteaba, bon ara onimaki.
Te Taramo 72: 1-2, 14-15, 17
Kaekana: A na bane botanaomata n taromauriko, te Uea.
Te Uea, angan te uea am moti, angan natin te uea am eti,
ba e na kaira am botanaomata me te eti ao e na kaeti taekaia am aomata aika kainano K
E na kamaiuia man te ioawa ma te tiritiri, a na kakawaki maiuia i matana.
E na aki toki te tataro i bukina, e na bane botanaomata n atonga kabaiana. K
E na neboaki arana n aki toki, e na teimatoa i an taai.
A na bane kain aonaba ni kabaia irouna, a na bane botanaomata n atonga kabaiana. K
Alleluia, alleluia.
E kaoti te burabeti ae kakanato i buakora: E roko te Atua ni kawara ana botanaomata. Alleluia.
Euangkerio
Warekan ana Euangkerio Ruka. 4:14-22
E okira Kariaraia Iesu, ma makan te Tamnei ae Raoiroi, ao e buta te aba arei n taekana. E reirei n aia tinakoka, ao a bane aomata ni kamoamoaa. E roko i Natareta ike E kaikawaki iai, ao E rin n te tinakoka, n ai aroni katein te tabati, ao E teirake ni wareboki. E anganaki ana boki te burabeti ae Itaia; ngke E kauka te boki, ao E bo ma te koroboki aei:
E mena i aou Tamnein te Uea, ba E kabirai ni katabuai. E kanakoai ba N na uota te Rongorongo ae raoiroi nakoia kainnano, ao N na kaota te bara nakoia aika kainaki, te manga noraba nakoia mataki, ao N na kainaomataia aika karawawtaki ma ni katanoata te ririki n akoi mairoun te Uea.
Ao E kaina te boki, ao E kaokia nakon te tabonibai, ao E tekateka. A bane mataia kain te tinakoka irouna. Ao E taetae nakoia ni kangai: “E kakoroaki bukin te koroboki anne i taningami n te bong aei.” Ao a bane ni butimaea ana rongorongo, ao a mimi n taeka n akoi ake E atong.
Tibatiba: E mena i aou Tamnein te Uea, ba E kabirai ni katabuai.
Ti ongora inanon te Kiritimati aron Iesu te Tei ngke e kaotaki n te temboro ni klakoroa nanon te tua are na kareanaki te nati te mane nakoin te Atua. Ao tao kam uringa ana baebaeti te burabeti are Timeon iaona n taku nakon te Atua ba e a kona ngkai n anaa ana toro ngkai e a tia n nora te Messia i matana. E oti ikai ba oin ke bukin rokon Iesu i aonteaba ba e na kamaiuia aonnaba. N te bong aio ao ti ongora iroun Ruka koron nanon taeka ae taekin Itaia ngke e kanga; “E mena i aou Tamnein te Uea, ba E kabirai ni katabuai. E kanakoai ba N na uota te Rongorongo ae raoiroi nakoia kainnano, ao N na kaota te bara nakoia aika kainaki, te manga noraba nakoia mataki, ao N na kainaomataia aika karawataki ma ni katanoata te ririki n akoi mairoun te Uea nakoia aoamata.
Man ana taeka Itaia aikai ao ti a reita kaotakira ba tera bukin rokon Iesu nako aonteaba. Ba e na kabaraira man te toronaki, e na kaurei mataia mataki, e na kabebeteia akana a rawawata ao e na uota te ririki n akoi mairoun te Uea. N tokin ana waereboki Iesu ao e motikia n tuangia ake a ongora ba e a kakoroaki bukin koroboaki aikai n te bong aei.
Tariu ao maneu bon aio ngkanne ana muioko Iesu nakoira n te bong aio ba ti na uota te rongorongo ae raoiroi nakoia aomata, tin a katoki aorakia, ao ti kaokia nakon te Uea. N aron Iesu ae roko ba E na karaoa nanon Tamana ao ai arora naba ba ti a manga kanakoaki iroun Iesu ba ti na karaoa nanon te Tama ba ti aonga ni bane ni karekea te maiu ae aki totoki. Eng bon akea riki te kawai ae tu na kamaiuaki iai ma ti ngkana ti anga ao ti kaburei maiura ibukin karaoakin nanon te Uea ni manga karokoa te rongorongo ae raoiroi nakoia aomata nako ao ni babetitoia n aran te Tama te Nati ao te Tamnei ae Raoiroi. Ti na kabiraki ao ni katabuaki ibukin kaburean maiura ni karaoan nanon te Atua.